A Him Ti Lomi Malaysia Um Chinmi Awthawng; Salai Johan Lal Awi Thang

Chin Digest| Vol.2, No.6 (2016 December)| Chin mi hi Malaysia ah kan himnak a um theng ti lo. Micheu cu misual kut in hma kan tuar i a cheu cu palek kut in fah kan tuar, a phunphun in fahnak nih nitin kan umkalnak ah a kan bawh i therther phangphang in riantuan zong ah kan um. Mi aw thawng thang deuh le rang deuh in a kalmi kan hmuh hna hmanh ah phundang chim cun kan mit-au “UI FIR” mit-au kan hluan i kan thin a phang i ka tha a ther. Tulio malay kan dirhmun hi zoh tikah micheu nih sal he kan i tahchunh i micheu nih a dangdang in kan i tahchunh tawn i ralzaam tiah min kan i bunh.

UN nih le cu hlan bantuk in kan zawn a kan ruat theng ti lo i a kan thlahthlam ngaingai cang. Cu tikah kan awlok a chong i micheu cu Laitlanglei tlun kan duh. Micheu cu tlun ah le kan ram a that rih lo tikah hlan kan dirhmun tein faihrem pangphit le dii-inn te i um le nilin lak ah lo thlawh than ding ah kan ruat kho hna lo. Kan mawh hrimhrim lo, a fawi bak ti lo.

Malay ummi Chinmi hi lam can-ceo ah laklawh nun tiah Saya Lian Chawn nih a ti hi tuak taktak ah cun kan si hrim ko. Tlun ah le kan ngamh deuh fawn tunglo, kal nakding lam nih le a har chin thluahmah. Malay um nih kan celh tuk theng ti hna lo i lam canceo ah aa kham cuahmahmi Chin miphun Malay um hi kan si tiah ka ruah.

Cheukhat cu misual kut in an nunnak a liammi an tlawm ti lo. Cheukhat cu mah taksa pum damlonak in an kan liam tak. Cheukhat cu nun hnabeidong in mah le mah nunnak aa hliammi zong kan tam ngaingai cang. Cheukhat cu kanmah miphun le miphun zuu din i, i sikvelhnak in a nun aa hliamh i a liammi zong kan um. Cheukhat cu pawcawmnak kawl in riantuan nakin a liammi zong an um hna.

Micheu cu kan nupile cung in nungak kan i duh i kan nupile le kan fale kan kaltak hna. Micheu cu kan vale cung in pa kan i duh i kan vale kan kaltak hna. Micheu cu zuu le sa he kan i ciah i micheu cu harnak nih tlangrai ban aa kan panh tawn.

Kan fale tete tleirawl tete nih thilsual tuah an hung thiam, nau thah, beer din, tbk le sualnak phunphun tuah an hun thiam hna. Kam khat lei hun tuak taktak ah cun Malaysia um CHIN MIPHUN hi ralzaam zawtnak in kan zaw taktak ko. Cucu ralzaam zawtnak cu zeitindah kan damh khawh lai tihi kan i hngal lo i cu ralzaam zawtnak dam nakding ah cun kan miphun le kan caholh, kan nunphung hi tanh le kanmah miphun i tanhnak hin kan dam kho lai i cucu ralzaam zawtnak lak ah sii-ai tha bik cu a si.

Tulio Malaysia hi thawngpang chia lawngte le cozah nih phungninglo rian tuanmi tlaikh-ihnak fak taktak in an tuah cuahmah i Malaysia um Chinmi kan hnabei a dong i zan ih hmanh me kan rem lo i rawl ei hmanh chungpil lo in kan um. Cheukhat kan nungak tete cu shopping mall deuh ah rian an tuan i cucu shopping mall chung hmanh ah Malay cozah nih phungninglo riantuanmi tlaihkhihnak an tuah i mitampi cu an tlaih cang. Cheukhat cu nau-sem ngei mi zong an um i an nule cu an tlaih hna hi a hrin semno cu tah le aihram in sunghno nu hnukthlum hlam in an tap an hram.

Micheu cu taksaa pum damlonak in sii-inn chungah phaisa pek awk ngei lo in lungrethei vansaang in a um i a tap a hram mi zong kan tlawm te ti lo. Micheu cu riantuan lo in lam kam ah kutdok in a um mi zong kan tlawm ti lo. Micheu cu kan nupile nih thlanmual an kan liamtak i kan pasalle nih thlanmual an kan liamtak. Micheu cu kan farle kan ta, hringtu kan pale nih thlanhmual an kan liamtak. Micheu cu misual nih an kan tlaih i phaisa thong sawm in i tlanh uh, nan tlanh lo ahcun kan thah lai tiah kan ta, kan pa le kan farle an tlaih mi hna misual kut chung phanmi zong kan tlawm te ti lo.

Micheu cu palek nih a kan tlaih i kan tuah lo mi sual an kan phawt i a kumkum in thong kan tla i phaisa tampi dih in kan i tlanh. Ruah khiarmar ah ngaih a chia i lung a zur. Hawidawt laihritlai miphun hna, Malaysia um Chin mi kan hram aw le kan tah aw hi nan ngai bal ve maw? Saltaang ko khi kan hluan ai e cu ka thin.

Chin miphun laihritlai ka miphun, ka dawt mi hna, kan sining le kan temtuar ning hi kan hngal ve hram uh! Chin Miphun hi hi ram ah kan him ti lo dahawh. Chanchuah ding ah nangmah theng kha kan in herh i na thlacam piaknak kha kan herh ko. Malaysia um Chin mi ralzaam chanchuah dingah lungkhat tein tuanrel cio hna usih! Lungrualnak in luat nak hmuh hraam usih! Thlacamnak in kan i bawm cio hna lai.+++

Na ruahning rak langhter ve.. (Leave a comment)

%d bloggers like this: