A Ho Si Ti Theihlomi Aizawl CID Kut in Tuan Kil Hakha Thonginn A Phan

Tuan Kil

Tuan Kil nih Sing 4130 Kyat a ka bat tiah Dr. Sui Hingz nih a tilio ah Tuan Kil nih Dr. Sui Hingz nih Sing 14,000 kyats a ka bat ve tiah tangka pek chanhnak tuah an timh lio ah Dr. Sui Hingz nih a riantuantu a nau le ahlanmi Hau Za le Kawl minung 3 nih thah an ka timh ti ruangah Tuan Kil cu Mizoram ah August thla a zam i Mizoram Palek nih Ramdang mi sinak in October 24, 2018 an tlaih, Mizoram Thonginn le biaceih zung nih a sualnak  an kawl cuahmah lio ah aho si ti theih lomi Aizawl CID minung pa kutin Rihkhawdar-Falam Hakha tiin November 15 zanlei 5pm tluk ah Hakha thonginn a phan tiah theih a si.

 

Riantuanti Tuan Kil (Laithuam) + Dr. Sui Hingz le an hawi

Aizawl Khualipi Thonginn a um, Biaceih zung nih bia an chah dih ka November 13, 2018 ah CID tiah ruahmi hna nih Biaceihzung a hun chuah bak in an auh i Private motor in Ramri Zokhuathar in Rihkhawdar palek sin ah an ap. Cu hnu in Falam in Hakha ah November 15 a phan tiah theih a si.

Hi kong he pehtlai in Tuan Kil Sihni Raymon Lalbiakzama nih “ Nizan ah an kalpi. CID nih an kalpi tiah ka theih. A ngaingai ti ahcun Kawlram kuat ding a si ahcun Bawngkawn Palek zung an rian a si. Palek zong nih zeihmanh an thei lo. Cucaah CID nih anmah tein an tuahmi a si ko. Sual an phawtnak kong he pehtlai in Aizawl Biaceihzung nih hlathlai biachah hmasa ding a si nain a thli tein an fir tikah zeiti tuah awk timi a har ngai” tiah Khonumtung ah November 15 ah a chim.

Palek theih lo in Tuan Kil an firnak kong he pehtlai in Tuan Kil a rak umnak inn ngeitu Pu Chhantea Khenglawt nih “ CID nih an ka nawl lo ahcun taza ka cuai hna lai I biaceih zungah kan I tong kho. A firtu hi CID Cung Lian Uk (Maliana) a si. A thiltuah ning hi Cozah phung ning he aa tlakmi a si lo. Amah duhduh in cung lei hnatlaknak telhlo in a tuahmi a si caah a kan nawlpat lo ahcun tazacuai a si ko lai. Ramdang mi sinak sualnak in an tlaihmi hi Kawlram kuat awk a si le silo aa fian hlan le amakhan in thonginn in chuah khawhnak caah kan tuah cuahmah lio a si. Kawlram ah kan kuat than ahcun a nun himnak caah tih a nunnak zong Sihni le Biaceih tu bawi hna zong fiang tein kan chim dih cang mi hna a si” tiah  Khonumtung ah a chim.

Hi kong he pehtlai in Tuan Kil nih “ Mizoram Aizawl k arak zammi hi Dr. Sui Hingz nih Sing 4130 sual a ka puh ruangah ka rak zammi silo in thah an ka timh ruangah ka zammi tu a si. Lih a ka puhmi hi a a dikbak lomi a si. Amah tu nih keimah tangka tampi a ka hlen, a miak pek ding le leiba cham ding tiah a ka kuatmi tu kha Tuan Kil nih a ka hlen tiah a timi a si ko. Dr. Sui Hingz cu CID cu aa ngei, Palek zong, Misual zong aa ngei. Keimah zong a minung pawl nih kan in thah lai tiah an ka tlerh. Cucaah Mizoram ka tlik lo ahcun sualnak a phunphun a ka kawlpiak lai I thong a ka tlak lai, a ka thah kho. Cu bantuk thihphannak le nunhimnak caah Mizoram ka zam ah ka him bik lai. Kawlram ahcun ka him lai lo ka ti caah ka zammi a si” tiah November 14 ah Khonumtung sin ah a chim.

Hi kong he pehtlai in CID he aa naihniammi pakhat nih “ September 6-7 Mizoram Siangngakchia, Mino bu le CID he tonnak an tuah lio ah Dr. Sui Hingz nih micheu tangka a pek hna, tam le tlawm cu ka thei lo. Cun CID pa le Sui Hingz hi hawikom phun aa thei hngal ngaimi an si” tiah The Chinland Post ah a chim.

Chin Public Company ah Tuan Kil Biachim lio

Tuan Kil Aizawl an tlaih ning kong he pehtlai in “Sui Hingz nih Kawlram mi Tahan ah tanghra tiang kai mi Mizoram ah a pem mi Cung Lian Uk a min din ah Maliana Mizo ram CID ah a tuanmi pumpak pehtlaihnak in keimah a ka kawlter i October (24) ah Cung Lian Uk nih palek sin ah mah nu Tuan Kil hi ID Passport ngei lo in Mizoram ah a ra Sui, Meithal, Number 4 a tuah i thil thalo a tuah ca ruangah tleih a hau tiah Report a ka tuah. Palek nih an ka tleih i Cung Lian Uk zong ra ve zei ca ruangah dah nan ka tlaih tiah ka ti Cung Lian Uk nih Sui, Meithal le Number 4 hna sumdawng ti in ka theih i mah caah kan in tlaih a ka ti. A tha ko, kan kal lai ka ti i Police nih sualnak ka ngeih lo caah ka kut zong an ka khit lo, Bawngkong palek zung kan phan. Ka sualnak cu Cung Lian Uk nih a ka report mi a si caah Cung Lian Uk nih ka sualnak cu a kawlter hna i ka sualnak an ka hmu lo. Cung Lian Uk nih ramdang mi sinak ID a ngeih lo caah ramdang mi sinak Case in thong ka thlak piak u tiah a ti hna. Kawl ram lei police sin in India ah report nak ca pakhat hmenh um lo ruang ah ram dang mi sinak Case lawng in Cung Lian Uk nih a ka report khawh” tiah Cakuat in The Chinland Post ah a chim.

Tuan Kil nih Kawlram a rak phakning kong he pehtlai in “ November 13 ah zalonnak na ngah cang tiah biaceih zung an ka ti I ka chuah bak kha CID a ka report tu Cung Lian Uk nih Bawngkawn police ah min na thu ta lai mah dih cun naa thumhnak inn ah kan chiah lai a ka ti i ka zulh. Private motor in a ka kal pi. Bawngkawn police ah cun a ka tumter duh lo. Amah a va lut i a rak chuak i a ka kalpi i ka tlun in cun kan kal lai lo maw tiah ka ti i a holh lo. Aizawl in a ka chuah pi i a ka fir ti ka theih ka phone le ka u le nih phaisa an ka kuatmi le ka tumbul te pawl zong ka lak hau ka ti nain a hau lo a ka ti. Cozah nih kawl ram ah va chia an ka ti a ti, Aizawl khua kan chuah bak ah a ka thlahter mi hna kha lam ah va tang hlah u, a rannak in Tio nan phak a hau a ti hna. A ka fir i a ka tlik pi tu hna hi palek pakhat hmanh an i tello. An min (Zual a) (Kim a) (Daniel Lal Hmun Sanga) timi pathum an si. Kan motor  hmai ah cozah kan si tiin catlap a tar ter hna i a rang taktak in mawtaw an mongh i, lampi ah veikhat hmanh kan dir lo. An motor number As 0/AV.5583  (ELECTION, DUTY, DO NOT DELAY) tiah a tial mi a si. Tio kan phan i palek nih an ka check lonak a ruang cu an hrokhrol in cozah kan si tiah a hmai ah catlap an tar caah a ran khawh chung in an ka fiar an ka tlik pi khawhnak cu a  si. Tio kan phan i OC sakhan hmupa a min Robert inn ah an ka luh pi i Cung Lian Uk nih sakhan hmupa a rak chonh i Kawlram ah chiah ding si cozah nih an ka fial tiah a ti i, Robert nih cun cozah nih an in fial cun police nu nih an rak thlah ding pei si cu a ti. Cung Lian Uk nih cun keimah an ka fial i kan ram palek  in ah rak chia a ti. Zan ah sakhan hmu Robert nih ihnak a ka kianh i a inn ah ka it. A dang a ka tlik pi tu cu kaa dang ah an it i zingka kan tho i sakhanhmu pa nih cun kawlram palek sin ap ding cu a ka kalpi tik ah cozah nih an ka kuat mi si lo ruangah thawng thanh cia mi um lo i, an ka ap kho lo.A rannak in Yangon lei  kha a ka tlikpi tu nih an chonh i a rang tein palek pawl kha Yangon nan  report nak ca kha palek nih hi ka palek sin ah rak kua hna seh tiah an chonh i fawibai ah an tuah kho lo. Zingka nazi pa 6 in an tuah i zanlei sml pa 2 ah Yangon cakuat an ngah in an ka kal pi. Chun nitlak a ka tlikpi tu pawl cu an lungrethei tuk an i tengtale, Yangon cu a ka tlikpi tu nih voi hra paoh cu an chonh. Sui Hingz maw an chonh aho an chonh cu ka thei lo. Yangon lei ca a tlin cun Tio sakhan hmu sinah an ka kalpi i Tio sakhan hmu pa nih Yangon in nihin kha atli timi in Nu Tuan Kil rak tlai uh tiah ca a ra i kan in tlaih tiah a ti i Falam ah rak chia uh tiah an ti a ti. Falam ka phan Aizawl i ka tlun in pawl Bawngkawn police (Station) an ka hngah i ka phak ti lo tikah an lau i thong ka tlaknak Center thong in ah an ka kawl i a um lo thong in a chuak i pei CID Cung Lian Uk nih inn ah a rak thlah cu tiah palek nih an ti i mah khan CID Cung Lian Uk nih a ka fir cu an theih. Aizawl cozah sin an kal i ka kong an va hal tik hna ah cozah nih ka fial mi si lo.” tiah The Chinland Post ah a chim.

Hi kong he pehtlai in Dr. Sui Hingz cu CID Tuan Kil a rak kua tu hna hi na thei mi an si maw, Aizawl CID naa thei mi an um maw? tiah  November 15 ah The Chinland Post nih biahalnak kan tuah nain a kan let kho rih lo.

Tuan Kil nih Sing 4130 Kyat a ka bat tiah Dr. Sui Hingz nih a tilio ah Tuan Kil nih Dr. Sui Hingz nih Sing 14,000 kyats a ka bat ve tiah an buai cuahmah lio a si I Dr. Sui Hingz nih Tuan Kil cu Kamayut Palekzung, Yangon ah taza a cuai lio a si. Zeitin dah pehzulh in rian an tuan te lai ti theih a si rih lo.

 

Na ruahning rak langhter ve.. (Leave a comment)

%d bloggers like this: