A voi 4nak CYO Cup An Chuih Cuahmah

Salai CungCung|2020 January 20| A voi 4nak Hakha CYO Cup pumpuluh chuih zuamnak cu January 20 in an thawk i January 28 tiang an chuih cuahmah tiah thawng kan theih.

“Tu kum a voi 4nak CYO Cup pumpululh chuih zuamnak ah a lut kho mi hi team 12 an si. Kan mah kan i timh ning ah cun an tam ngai. A ruang cu kum dang nak in tu kum ah kan kuah deuh, hlan ah cun CYO constitution ning in sang pa 8 le pengtlang pathum lawng kan i timh. A sinain tu kum cu a chuih duh mi pengtlang tete an um tik ah ( pengtlang ah Hakha um Zophei,Mara, University Students) pawl tete kha tel a duh mi an um caah meeting kan tuah i zapi cohlan si ko seh tiah biachahnak kan ngei. Nain tu kum ah hin sawm mi chung ah aa tel kho lo mi team pawl cu, CCU, Hakha College, GTI, Mar,Lautu an si. Hmailei ah cun aa tel kho lomi team pawl zeitin an i tel khawh ve lai ti in kan zuam piak hna lai” tiah CYO President Salai Van Cin Thang nih The Chinland Post ah a chim.

“CYO Cup hi zapi nih thazaang pek cio ding in kan sawm hna. A ruang cu CYO kan rian tuannak ah hin zapi kan i tel khawhnak lam pakhat zong a si fawn. CYO nih kan i timh mi le kan ruahnak cu kan miphun caah le kan mino hna zeitin kan I funton khawh lai ti hi a si , cun zeitin dah kan ram caah rian kan tuan khawh lai ti hi kan ruah mi cu a si. CYO Cup lawng ah si lo in CYO kan rian tuannak zapi tein thazaang rak kan pek cio uh ti sawm kan duh hna” tiah CYO president nih a chim chap.

Hi avoi 4nak CYO Cup pumpululh chuih zuamnak ah luh man hi team khat ah Kyats 50000 a si. Pakhatnak laksawng ah Sing 7 le Trophy, pahnihnak laksawng ah Sing 2, pathumnak um ti lai lo. Best player pawl caah trophy pek an si lai. A voi 3nak CYO Cup Champion cu Hakha Khuathar an si tiah kan theih.+++