Aa Hlat Mi Kawp Ca Ah Dawtnak Karhter Ning
Chin Digest| Vol.3, No.5 (2017 December)| Atu kan chan cu kan theih cio bang fimnak a sang tuk cang i kan vawleipi hmanh khuate fate pakhat bantuk in ruah a hung si cang. Vawlei cung hmun zakip ah khua kan sa, kan i thek hna. Hrial khawh lo in kan ton cuahmah mi kan chantiluan ruang ah kan duhdawt mi hna he zong hmun khat ah um ti kho lo in a ruang tampi ruang ah hmun dangdang ah a um mi tam chin lengmang a hung si.
Umnak hmun cu a biapi lo, lungthin aa naih poh ahcun a poi lo, an ti tawn. Asinain, umnak hmun aa dannak a sau, i hmuhtonlonak a sau hin cun i zumhnak a zor i thi a dai deuh tawn. A tanglei ah hin aa hlat mi kawp ca ah nan i dawtnak karhter ning lam, ruahnak kan hun in cheuh hna.
1. Caan hman tein i chawnbia u
Caan hman tein i chawnhbiak hi aa duh mi kawp ca ah a herh taktak mi a si. Nikhat ah sml 24 chung i chawnh hi a hau lo. Caan hman tein i chawnhbiak tu hi cu a herh bak. A bik in hmun khat ah a umti lo mi hna ca ah a herh khun. Pakhat le pakhat i chawnhbiaknak nih i zumhnak a thanter. Hmurka in a chuak mi bia dawh le holh thlum nih lungthin a damter i lung zong a hmuiter. Ka dawt cu a theih ko hen cu, tiin dawtnak kong chimh bal lo hi tih a nung ngai. “Na tho tha maw?” “Mangtha mu” “Kan dawt tuk” ti mi bia pawl hna hi theih cia zong ah theih than duh lengmang mi hna an si.
Cucaah, caan hman tein kan dawt tuk tiah nan i ti khawh nakhnga caan hman tein nan i biakchawnh a herh.
2. Ruahthiamnak
Hmun dangdang i um hi i ruahpalh a fawi ngaite. A caan cun i tinh ning in thil a kal khawh lo caan a um theo. Khi bantuk caan ah khin ruahthiamnak a um lo ahcun i sikthiat a fawite. Nan i tinh ning in thil a can lo tik ah a sining cang kha tha tein le zumh tlak tein i chim u. Nan thinhunnak, nan ngaihchiatnak, nan lungtlinlonak, chimh awk a tha mi poh cu thup lo tein i chim dih u. A sin ah zei hmanh thuh i tim hlah, bawmh na herh ah cun bawmh zong hal ko.
Nan harnak nan i hrawm mi le nan ngaihchiatnak nan i hrawm mi nih nan i pehtlaihnak ah thuk deuh in rian a tuan lai. Ruahthiamnak lungput he i zawnruat u.
3. Thil aa khat mi te tuah ti u
Cauk nan rel mi, nan hla ngaih mi, nan TV zohmi pawl hna khahter u. Nihin cu mah movie kha zoh usih tibantuk in i chim ulaw mah nan zoh veve mi kha nan i chawnh tik ah i ruahti u.
Mah khan bia ruah ding zong tam deuh nan ngei lai. Nan umnak hmun aa khah lo hmanh ah nan thinlung nan i theihthiam veve ah cun hmun khat te i a um mi bantuk in nan i ruat ko lai.
4. Nan tuah tawn mi i theihpiak u
Pakhat le pakhat caan hman ningcang i theihpiak dih ah a tha. Tahchunhnak, sml zeizat ah dah a thawh tawn, a ih tawn, zeitik ahdah zing rawl a ei tawn, khawika dah a kal tawn? tibantuk in a tuah tawn mi tete hi i hngalhpiak a herh. Cu tin nan i theihpiak dih ahcun pakhat le pakhat nan i zum lai.
5. Nan sining hi i uang u
Hmun khat nan umti lo ruang ah nan lung rawh caan tampi a um ko lai, hawi bantuk in hmun khat umti i nuam tein kut i tlaih i lenti zong nan duh tuk ko lai. Nain hihi va ruat peng u, “hmun khat kan umti khawh nakding ah i hlat hmasa ta a herh” ti mi hi. A ruang cu nan i hlat camcin lai lo. Nan i tong te ko lai. Hmun khat nan umti lo hmanh i nan i zumh khawh le nan i duh khawh ko ahcun hmun khat nan um te tik cun aa nuam bik mi kawp nan si te lai…
6. Laksawng i kua tawn u
Laksawng hi dawtnak langhternak ca ah a tha bik mi a si. A nganpi a si lo hmanh ah a fa tete an si zong ah dawtmi sin in hmuh mi laksawng cu a sunglawi bik mi a si caah nan ca ah sullam tampi a ngei lai. A caan cun, amah kong catlap cung ah ballpen in na tial mi zong kha hmantlak in hei kua pah tawn. Computer in tial mi nakin a thinlung ah rian a tuan deuh ving lai.
7. I tlawng pah tawn u
Ram khat um mi na si ko ahcun i tlawng pah tawn ulaw a tha. Pakhat le pakhat sau tuk i tong lo in um hi a caan cun a har pah tawn caah mu. Inn chung um lio lawng mui lang in i chawnh si lo in lam nan len lio, dawr nan kal lio tibantuk caan zonga h i chawn tawn u, mah nih tampi nan lungthin an naihniamter deuh hna lai.+++
About The Author
