AA Kut In Sakhaan-hmu Salai Beva Le Khuabawi U Chia Haw An Luat Cang

TCP-Hakha| 2019 February 27| 2019 February 22 ah AA hriamtlai phu nih an tlaihmi hna Chin ramkulh, Paletwa peng, Tantaung khuabawi U Chia Haw le Tantaung sakhaan-hmu Salai Beva cu AA nih tuchun ah ngandamte in an thlah than cang hna tiah theih a si.

February 22 ni ah AA hriamtlai phu nih Tantaung khua palek bawi Salai Beva le khuabawi U Chia Haw cu an rak kalpi hna i ni 5 a rauh hnu ah AA ralkap lei nih khuami cu rak la hna u tiah thawngthanhnak an tuah hna hnu ah atu bantuk in an  luat hi a si.

“2019 February 22 ah AA hriamtlai phu nih an tlaihmi hna Chin ramkulh, Paletwa peng, Tantaung khuabawi U Chia Haw le Tantaung sakhaan-hmu Salai Beva cu an luat cang. AA nihTantaung khuabawi U Chia Haw le Tantaung sakhaan-hmu Salai Beva cu tuchun (February 27) suimilam 11:00 ah AA phu nih Busin khua ah kaltak in an thlah cang hna. Atu ah Busin khuami nih a luatmi pahnih cu vok pakhat an thahpiak hna caah Tantaung khua an phan rih lo” tiah Bu Htang Pai nih a facebook cahmai ah a tial.

Chin ramkulh cozah lei nihcun hi kong ah zeihmanh thanhnak an tuah rih lo tiah kan theih.

Palek pakhat le khuami pakhat zong February 22 ni ah an tlaih chih hna tiah Rakhine media nih an thanh. Asinain, anmah pahnih kong tu cu Bu Htang Pai nih a thanhchih lo tiah theih a si.

Union cozah le CNF/A kahngol hnatlaknak minthutmi ah Chin ramkulh chung ah cozah ralkap le CNA ralkap lawng umnak nawl pek siseh an si tiah kan theih.

Leave a Commnet

%d bloggers like this: