AA Nih Chinmi 5 An Tlaih Hna I Media Le Cozah Sin Nan Chim Ah Cun Kan Thah Hna Lai An Ti
Hakha TCP |2019 May 22| AA nih Rakhine ramkulh Minpia khua peng chung um Chinmi minung 5 cu May 15 ah khan an tlaih hna i hi kong he pehtlai in Media le cozah sin thawng nan thanh ah cun kan tlaihmi minung 5 cu kan thah hna lai tiah khuami cu an tlerh hna tiah khuami pakhat nih a chim.
Min chim duh lomi khua mi pakhat nih, “Rakhine ramkulh Minpia peng chung ah Chinmi tampi an um, kan mah Kye-mahkye khua in minung pakhat aa tel ve. Cun kan khua pawngkam khua pakhat in minung 4, cu chung ah nu pakhat aa tel. An tlaih hna cu May 15 lio khan a si cang. Tu ni tiang an rak thlah rih hna lo. Cun tu an tlaihmi hna hi media sin le cozah sin thawng nan thanh ah cun kan thah hna lai ti an tlerh hna” tiah a chim.
AA nih an tlaihmi minung 5 cu nu pahnih le pa pathum an si i khuate cheukhat ah AA pawl an um rih ko tiah kan theih.
“Avoi khatnak AA nih an tlaihmi hna cu ramlak ah Thing hlam ding in a kal mi pafa hna, nu pahnih le an pa an si. AA nih an tlaih hna ti thawng theih hnu ah an tlaihmi nu i a va pa nih a va kal hnawh hna i a mah zong an rak tlaih chih. Cun khuami pakhat zong a nupi an tlaih ve caah a va kal i an rak tlaih ve. Khua dangdang ah thawngpawng kan va hlat ding in pehtlaihnak kan tuah tikah ho manh nih an chim ngam hna lo. A ruang cu an pawngkam ah AA pawl an um caah a si tiah kan thieh” tiah khuami pakhat nih chim.
Rakhine ramkulh he ramri a si mi Chin ramkulh Paletwa peng zong ah Kawl ralkap le AA kar kahdohnak ruang ah cheukhat khua mipi hna cu mah le khua chuah tak in khua dang ah ralzaam dirhmun in an um tiah kan theih.
Ref: Chin World
About The Author
