AA Nih Paletwa Hi Rakhine Ramchung I Khumh An Timh Ruang Ah KNP Nih An Dohkalh
Tawk Tling Thang |2019 January 24| AA (Arakan Army) hriamtlai phu nih Paletwa peng hi Rakhine ramukmi chung i khumh an timh ruang ah Khumi (Khami) National Party (KNP) nih January 24 ah dohkalhnak cathanh an chuah.
AA hriamtlai phu nih Paletwa peng chung an cawlcanghnak ah khuami hna cu Paletwa peng hi Rakhine ram le vawlei a si. Dohthlennak kan hlawhtlin cun Rakhine ramkulh chung ah kan fonh lai an ti hna. Hi ruang ah atu bantuk in KNP nih dohkalhnak cathanh an chuahnak cu a si.
Paletwa peng hi Myanmar ramchung ah aa tel, Rakhine kut tang ah a um lo, The Chin Hill Tract Regulation tang zong ah a um lo. 1947 kum Panglong conference dih hnu ah tlangcung chekhlat committee phu nih biahalnak tuah a si tikah Rakhine lei palai hna nih Myanmar he i fonh in zalonnak laak an duh caah kannih cu Chin Hill Tract Regulation he i fonh i ramkomh chungtel si kan duhnak kong kan chim i 1947 kum phunghrampi ning in Chin Wit-de-tah-taing, Chin ramkulh chung ah telh kan si.
AA hriamtlai phu cu Myanmar ralkap he an i kah lio ah Paletwa peng khuami hna facang, ar le vok pawl cu hramhram in an laak i dothlennak a dih tikah kan in cham te hna lai tiah AA ralkap nih an chimmi bia ruang ah atu bantuk in dohkalhnak cathanh hi an si.
AA hriamtlai phu nih a dikmi federal ramomh chuah khawhnak ding, Rakhine miphun hna nih mahte khuakhan lairelnak ngeih khawhnak ding cawlcanghnak an tuah lio ah Paletwa peng cu Rakhine ramkulh chung ah khumh ding in AA i ram detkhawtnak policy hi fakpi in kan dohkalhnak hi cathanh kan chuah tiah an langhter.
AA hriamtlai phu le Myanmar ralkap cu Paletwa peng chung i an i kah ruang ah khuami harnak fakpi an tong. A zaammi zong an tampi cang. Cu lawng si lo in kaphnih ralkap nih harnak an pekmi hna kong chimphuan lo ding in khuami hna cu an tlerhkhonh hna tiah kan theih.
Tutan AA hriamtlai phu le Myanmar ralkap i tukdohnak in kaphnih ralkap a thimi zong an um. Cu pin ah khuami zong ral ruang le vawlei tang mine bomb chiahmi ruang ah a thimi zong an rak um bal cang. Ral ruang ah Mizoram tiang zong an rak zaam bal cang tiah Kawl media cheukhat cherhchan in theih a si.
About The Author
