AA Nih Paletwa Peng Tan-taung Khua Ah Chinmi Pali An Tlaih Hna

0

The Chinland Post| 2019 February 24| Chin ramkulh thlanglei Paletwa peng Tan-taung palek sakhan cu AA nih Febuary 22 zinglei ah an kah hna caah Tan-taung palek bawi le an khuabawi telh in Chimi minung pali an tlaih hna tiah kan theih.

“AA ralkap nih an tlaihmi hna cu; Tan-taung khua palek sakhaan-hmu Salai Bi Va, khuabawi Pu Chia Haw, palek pakhat le khuami pakhat an si. AA ralkap 40 hrawng an ra i voi 5 hrawng meithal an puah. Sakhaan-hmu an va auhter hna i meithal chuah ding an fial, a duh lo caah an velh. Khuami pali cu ramlak ah an kalpi hna, cu tlawmpal ah ramlak ah meithal puah thawng kan theih chap. Meithal thawng kan theihmi ruang ah khuami pawl thinphang thlalau in kan um ko” tiah khuami pakhat nih Narinjara media sin ah a chim.

Tan-taung khua pawng Khuaikaung khua ah a ummi Pastor Thian Run Thang nih, “Atu bantuk in i kahnak a chuakmi le Chinmi tlaih kan tonmi ruang ah khuami cu lungrethei vansang in kan um ko. Chinram chaklei mizapi le CNF zong nih khualrangte in tlangtlak le bawmhchanh kan herh ko. Hiti ning te a si ko ahcun thihnak le harnak fakpi zong kan tong kho. Atu tiang thawngpang kan theihning ahcun Pathian a tha i kan him rih. Cucaah, thlacamnak lawng si lo in a kapkip in bawmhchan kan herh ko” tiah The Chinland Post ah a chim.

AA ralkap ralkap le cozah ralkap cu Tan-taung varal Wat-chuang khuate he khan 3 tluk aa hlatnak ah an i kap. Cu dih hnu ah zing suimilam 8:30 hrawng zong ah suimilam cheu chung kaphnih kar i kahdohnak a chuak than.

“Tann-thaung palek sakhan cu AA ralkap nih an kulh hna hnu ah i an kah hna pin ah palek bawi le khuabawi cu an auhter hna i an kal pi hna, ti tiang lawng kan theih caah pehzulh in an konglam kan hlathlai lio pi a si” tiah Hluttaw palai U Kaan Htin nih a chim.

AA ralkap nih Tann-thaung palek sakhan ah meithal an hal hna i an pek hna lo caah palek bawi an kal pi hi a si’ tiah Paletwa palek le khuami cheukhat hna nih an chim.

AA le Kawl ralkap cu 2018 kum dih lei in Rakhine ramkulh chung le Chin ramkulh Paletwa peng chungah ral tuknak a rak chuak. Febuary 22 ni ah Paletwa peng ah an i kap than. An i kahnak a fahchin lai phan ah ralzam dirhmun in a ummi hna cu eidin kongah lungrethei in an um tiah kan theih.

Cozah le CNF/A hnatlaknak min an thutmi ah Chinram chung ah cozah ralkap le CNF/A ralkap lawng umnak nawl pek siseh timi aa tel. Cozah he chawnhbiaknak a ngei lomi le minthutnak a ngei  lomi AA hriamtlai phu nih Chinram chung i hmun an khuarmi hi  CNF le cozah cung ah tuanvo nganpi aa hngat tiah kan theih.

About The Author

Na ruahning rak langhter ve.. (Leave a comment)

%d bloggers like this: