Aa Tlaimi 8 Lakah Chinpa Tun Lin Aung Aa Tel

TCP-Hakha| 2019 April 8| Rakhine ralkap AA phu nih an tlaihmi Suh Htoo San company riantuantu 8 lakah Paletwa peng Leihkung (1) khua um Chinpa U Tun Lin Aung zong aa tel i a rannak in thlahpiak ding ah innchungkhar lei nih an nawl hna.

Paletwa khua in meng 6 hrawng a hlatnak Leihkung (1) khuami U Kyaw Aung i fapa Tun Lin Aung (kum 34) cu Kaladan simanking ah a cheuchum a simi Chin ramkulh Paletwa in India- Mizoram ramkulh Zorampui tiang motor lam a comi Suh Htoo San company ah vawleicawhnak theng motor mongtu a si. Zei bantuk ralkap ngiathlaitu he hmanh pehtlaihnak a ngei lo” tiah hringtu a pa Kyaw Aung nih a chim.

“A hlan ah Hpakant ah vawlei conak seh a mong. Atu hringtu nu le pa inn ah a rak tlung i Suh Htoo San company ah mi pakhat kan herh an ti i cuka ahcun rian a tuan. Ralkap i ngaitthlainak he zeihmanh pehtlaihnak a ngei lo ti cu Paletwa khuami vialte zong nih an hngalh ko. Atu ah an tlaih ti kan theih tikah hringtu a nu zong rawl a ei khawh lo caah kan fapa hi ngandamte in inn ah rak tin than seh ti kan duh. Zaangfah te in rak  kan thlahpiak uh” tiah U Tun Lin Aung i hringtu a pa nih Khonumthung media ah a chim.

U Tun Lin Aung cu vawlei cawhnak seh a monghmi in a biapi in chungkhar a cawmtu hna a si. India-Myanmar ramhnih pehtlaihnak Paletwa le Zorampui tiang lamhnih kal motor lam a cotu Suh Htoo San riantuantu hna cu an riahnak Twinkinalawng khua ah thazaang 100 renglo a simi AA phu nih March 30 ah an luhhnawh hna i pa 11 le nu 2 an tlaih hna.

Cu chung ah pa 3 le nu 2 cu an thlah than i minung 8 cu AA nih an thlah rih hna lo tiah theih a si.

Ref: Khonumthung

Leave a Commnet

%d bloggers like this: