AC Naylon Kat-ta-za Thantlang Khua Papek In An Phah Lai

Salai Elvis| 2018 August 20| Hakha khua chung khaan 3 tluk phah cangmi AC Naylon Kat-ta-za cu tukum chungah papek in Thantlang khua chung an phah ve lai tiah theih a si.

Mah AC Naylon Kat-ta-za cu Chin ramkulh huap phah dingin timhtuahnak ngeih a si ko nain Hakha khawh in a fiang cang mi cu Thantlang khua ah a si” tiah Lam le sul vuanci nih a chim.

“Mini Budget cu a dih cang lai caah budget ngan deuh mi cu tukum October thla in aa thok than lai i 2019 September thla tiang a si lai. Hi chungah Thantlang khua hi papek in kan thok lai. Zeizat dah budget a dih lai timi le zeitik in rian an thok lai ka thei rih lo. A si nain keimah ruahnak ah cun tukum November- December thla chungah rian an thok lai ka zumh.” tiah lam le sul vuanci Pu Sui Thio nih TCP ah a chim.

Thantlang khua chung AC Naylon Kat-ta-za phah nak kongah Thantlang khuanu/pa hna nih Vice President Pu Henry Van Thio sin zongah Hakha dih in Thantlang khua papek in phah piak dingin an rak hal bal tiah theih a si.

AC Naylon Kat-ta-za cu Thantlang dih in Falam tiin a changchang tein phah an timh hi a si. Hmai kum chungah Hakha khuachung phah rih lo mi siizung lam le ka dangdang zong an phah chap rih lai.

Atu bantuk in AC Naylon Kat-ta-za cu 2017-2018 budget in 2018 January 1 ni in Hakha khuachung phah hram an thok i khaan (meng) 3 caah (2608.50 million) dih in ramkulh sakremhnak zung nih tuanvo lak in phah a si. 2020-2021 kum ah Hakha khuachung phah rih lo mi zong an phah than dih lai tiah theih a si.+++

Na ruahning rak langhter ve.. (Leave a comment)

%d bloggers like this: