AC Nylon Kattaya Hi Kan Kilven Thiam Lo Ahcun A Feh Hlan Ah A Rawk Dih Kho

Salai Ngun San Aung| 2018 April 27| Chin ramkulh khuahlipi Hakha ah World Bank bawmhnak in phah cuahmahmi AC Nylon Kat-ta-ya hi set caah hmanmi sii pawl, Datsi, Diesel, Hydraulic, zinaan, Engine oil tibantuk pawl he aa ralmi a si caah tha tein mizapi nih kan kilven le kan dawt thiam a herhnak kong lam lei zung lutlai (Sohlohyee) nih an chim.

“AC Nylon hi Datsi, Diesel, Zinaan, Engine oil le hydraulic pawl, a fawinak cun set sii, chaw sii timi paoh he aa ralkah taktakmi a si. Tu i kan phahmi khi hi hmuizum chunh hmanh ah fawi tein a pawk lai lo. Asinain a cunglei sii pawl hi kan thlet hnawh, toih sual ahcun cu nih cun a ciah i zarhkhat hrawng a rauh ah khin AC Nylon cu kut hmanh in hawh khawh ding tluk in a nem kho. Khaihriat kual zinan chung i kan ciah tikah a thang i a nganpi nain fawi tein chah khawh a si bantuk khi a si. Cun AC Nylon kaa khatkhat in a rawh sual ah cun Kat-ta-ya sawhsawh bantuk in lam a rawhnak zawn te kha belh awk a tha lo. Hmun khat khat in a rawh ahcun ti a lut lai i duhsah tein a rawk thluahmah ko lai. Cu remhnak caah Cozah sin ah tangka hal chap hna usilaw an kan pe fawn lai lo. Zeicatiah AC Nylon cu kum cu zat tiang a fek lai timi rikhiah a um cia i cu hlan ah kan hrawh sual ahcun sungh zatlak sawhsawh kan si ko lai. Cucaah mizapi nih a hman kan thiam i kan dawt a biapi tuk” tiah an chim.

Hakha khuachung lam an phahmi cu Thantlang lam pial in Palek sakhan tiang an lim cang i a tu hi Za Hu lam (A hlan Matupi lam) lei furlong pali lawng a tang cang.

“Lam kan phah tikah hin a tanglei dan caah tiin lung le thetse tibantuk zong kan phah hmasa. Khakha lam kam um cheukhat nih AC kan phah hlan ah a khu tuk tiin ti hna an rak toih. A tangdan kan phahmi kha ti an toih ahcun AC kan phah tikah a tlaih/sengh khawh ding tluk in a seng kho ti lo. Cun lam kan phahmi khi a linhsat (Temperature) cu tluk a si lai timi a um i kan toih in suimilam 48 chung ah motor a ke a bo hlei (point ngei mi) tibantuk zong kal a ngah lo i cycle te hna zong kal awk a tha lo. Cucaah kan kham tawn nak kong a si i kan kham mi hna an phah, a cung ah an kal- cu tikah a feh ding tluk in a fek ti lai lo. Kan phah lio ah Cycle a kal ahcun a neh aa hngal, cu aa hngalmi cu kan nalh than tikah a hrim kan phah mi tluk a si ti lo” tiah an chim chap.

Na ruahning rak langhter ve.. (Leave a comment)

%d bloggers like this: