ACSY Nih Chin Person of The Year Caah Vice President Henry Van Thio A Thim

Tawk Tling Thang| 2019 February 4| Yangon hrambunh Chin Miphun Zapi Zatlangbu (All Chin Society Yangon_ACSY) nih 2018 kum Chin Person of The Year caah Myanmar ramkomh Vice President Henry Van Thio a thim tiah kan theih.

Hi kong he pehtlai in ACSY in vawlei le innsaknak lei committee Secretary Pu Tha Bik nih, “ACSY nih 2018 kum Chin Person of The Year caah Myanmar ramkomh ah Vice President a tuan liomi Henry Van Thio kan thim. Yangon ah tuahdingmi February 20, Chin Miphun Ni ah Roca peknak kan ngeih te lai” tiah The Chinland Post ah a chim.

Photo: The Chinland Post

Zeiruang ah dah amah nan thimnak a si tiah The Chinland Post nih biahalnak kan tuahmi cung ah hiti hin a kan leh.

“Vice President Henry Van Thio Person of The Year kan peknak a ruang hi pahnih te lawng a si ko. Cucu; pakhatnak ah Chin miphun nih kan tuan khawh bal lomi Myanmar ramkomh ah Vice President rian a kan tuanpiak hmasa biktu a si le a pahnihnak cu Chinram lawng si lo in Myanmar rampi thanchonak ding ah a kapkip in a kan zuampiaktu a si ruang ah a si ko. Zeidang tahfungh le phunglam dang zohchih in kan thimmi le pek kan timhmi a si lo.”

Photo: The Chinland Post

Chin Person of The Year laksawng cu ACSY tawlrelnak in tuahtimhmi Yangon Chin Miphun Ni ah an pek te lai. ACSY hi Chin zatlang bu lakah a ngan bikmi a si. Chin miphun tengnge 53 a huapmi bu a si. Amahbelte, zatlang bufonh in aa telmi zapi cu 19 an si.

ACSY hi 2016 kum, Chin zatlang bu vialte nih Vice President Henry Van Thio lawmhpinak an tuahnak in a dirmi bu a si. Chin miphun zapi “I Lungrualnak” (unity) hi an hmuitinh a si. Cu bantuk in Chin miphun tlangthuam asiloah Tlang Angki a serchuahtu zong an si. Hmailei ahcun Chin miphun tlangholh ngeih khawhnak ding aa hmuitinhmi zong an si tiah kan theih.

Na ruahning rak langhter ve.. (Leave a comment)

%d bloggers like this: