AI Nih A Sang Bikmi Nuhrin Covo Laksawng Daw Aung San Suu Kyi A Chuh
The Chinland Post| 2018 November 13| Rakhine ramkulh mitlawm Rohingya cung ah a fakmi thlanglamhnak pawl rampi ruahnak petu Daw Aung San Suu Kyi nih dohkalhnak, khamnak le thlauhnak a tuah lo caah ti in laksawng a petu AI (Amnesty International) bu nih a sang bikmi nuhrin covo laksawng an pekmi cu November 12 ahkhan kan chuh than tiah AI nih an thanh.
Daw Aung San Suu Kyi nih laksawng a cohlan lio ah a chimmi zumhnak le lungput biakamnak pawl a tuah lo timi amah pumpak nih a hngalh thannak ding caah atu bantuk in a laksawng kan chuh thannak hi a si tiah AI bu in chimnak nawlngeitu nih VOA ah a chim.
Hlan ralkap cozah chan_ a luancia kum 20 hrawng lio i inn thongtlak a tuarmi Daw Aung San Suu Kyi cu ralkap bawi pawl thlanglamhnak sungh pek lo le a khuk aa bik lo caah vawleicung ramkip zohchunh awktlak democracy cawlcanghnak hruaitu pakhat dirhmun in 2009 ah AI nih a sang bikmi nuhrin covo laksawng a simi International Ambassador of Conscience Award timi ramkip zumhtlaknak lei kongkau minthatnak laksawng an rak pek.
AI bu in Asia Pacific kongkau tuanvo ngeitu Francisco Bencosme nih atu bantuk in laksawng an chuahnak kong a chimphuan.
“Kannih nih kan zumhmi cu Myanmar ram ah nuhrin covo dirhmun chiatnak hi a rang tuk i a biapi in fak tuk in a tuartu Rohingya pawl telh in mitlawm tlangcung miphun hmunhma ah nuhrin covo buarnak pawl hi Daw Aung San Suu Kyi hruaimi zatlang cozah hruaimi caan lio ah a si. Hi ruang ah tihnung tukmi tuahsernak pawl chuak lo in khamding a simi Daw Aung San Suu Kyi nih a tuah lo caah nuhrin covo buarnak dirhmun a chia chinchin ti kan zumh. Cun, Kachin le Shan ram ah a cangmi ral i tuknak ruang ah minung 100,000 hrawng nih an inn le an lo an zaamtakmi kongkau zong hi NLD hruaitu pakhat sinak dirhmun in aa hngalhter fawn rih lo”.
Laksawng chuh an timhnak kong AI phu in General Secretary Kumi Naidoo pumpak nih Daw Aung San Suu Kyi cu naite ah khan ca a kuat. Asinain Daw Aung San Suu Kyi leikap in AI phu sin ah zei bantuk lehnak hmanh a tuah lo tiah Francisco Bencosme nih VOA ah a chim.
Cu lawng si lo in Myanmar ram nuhrin covo buarnak pawl ah tuanvo a ngeitu bik cu Myanmar ralkap an si tiah AI phu nih a zungzal ti awk in an langhter. AI cathanh kip ah Myanmar ram ralkap lutlai pawl hi sualnak an tuahmi chekhlat i dantatnak pek ding a herhnak kong zong tette pawl kan langhter peng tiah Francisco Bencosme nihcun VOA ah a chim.
AI nih Daw Aung San Suu Kyi laksawng atu an chuhmi a sang bikmi Nuhrin Covo laksawng (International Ambassador of Conscience Award) a co balmi ah a thi cangmi South Africa hruaitu Nelson Mandela, Pakistan ram Fimcawnnak lei kongkau a cawlcangtu Malala Yousafzai le Tuluk cozah a dohkalhtu minthang Tuluk zungmawi thiam Ai Weiwei zong an i tel.
Myanmar rampi ruahnak petu Daw Aung San Suu Kyi cu Rakhine ramkulh buainak le Rohingya thlanglamh sersatnak tuahmi a caanhmante in thlauhnak le khamnak a tuahmi lo ruang ah siseh, ralkap nih sualnak an tuahmi dohkalhnak kakhat hmanh a chim lo ruang ah ramkip nih minthatnak laksawng (award) an pekmi phun 9 hrawng an chuh cang. Hi chung ah ramkip minthatnak laksawng cheukhat cu October thla ah Canada ram nih 2007 kum ah an pekmi rammi minthatnak laksawng telh in March thla ah American ramkomh Holocaust museum nih 2012 ah an pekmi Elie Weisel laksawng aa tel.
Ref: VOA, BBC Burmese
About The Author
