Aibur Khuami Mai Annie Ngun Kip Sui Nih 5D In Tanghra A Awng
Annie Ngun Kip Sui apa Rev. Za Thang le Anu Pi Ngun Hniang he/TCP
Salai Bawi Lian Sang|TCP-Kalay|August 24, 2020| Thantlang peng Aibur khua Rev. Za Thang(GS-ZPBA) le Sayamah Ngun Hnaing(Hakha High School No.1) hna an fanu Mai Annie Ngun Kip Sui Cu 2019-2020 Kum tanghra result ah 5D (Burmese, Math’s, Chemistry, Physics le Biology) in Zinyaw Private High School, Yangon in tanghra a awng tiah kan theih.
Chungkhar lei nih Tanghra awn Pathian sin lunglomh thlacamnak le rawldumtinak cu August 23, zarhpi ni zan lei 1:00 in Aibur khua Baptist Khirhfabu ah an tuah. Aibur khuami zong nih August 22 ah Pathian sin lunglawmh thlacampiaknak an tuah. Mah an tuahnak ah Zophei Baptist Association (ZPBA) le Hakha, Thantlang, Congthia, Tisen le Khua dangdang tiang sawmmi an ra kho hna. Pumpak, Khrihfabu, phu le bu in lunglomnak roca zong an pek cio.
“Annie hi tanghra a kai lai thlacampiaknak kan tuah I cu hrim ah a tlawmbik 5D tal ngah ding hrim Pathian sin thlacamnak kan ngeih cang. Cucu Pathian nih aa zuamnak le kan thlacamnak a kan leh tiah kan ruah I kan ilawmh khunnak a si’ tiah chungkhar pakhat nih The Chinland Post ah a chim.
2019-2020 Cacawn kum ah Aibur in tanghra a awngmi ( 9 ) an si I 5D in Annie Ngun Kip Sui le 1D in Tha Hlei Khun hna nih an ngah tiah kan theih. Aibur cu Thantlang peng ah aummi a si i inn (180) le milu (1400) fai khua a sami an si.
About The Author
