Aizawl khua ralzaam chung in pum tlamtling lo hna caah adang tein umnak an herh
The Chinland Post | 2022 May 18 – Chin ramkulh, Matupi in Aizawl ah a zaammi ralzaam chung in pum tlamtling lo hna caah adang tein umnak an herh tiah pum tlamtling lo ralzaam chungkhar nih Mizzima ah an chim.
A luancia 2021 November chungah Matupi peng ah a ummi Ngalai khua le Phanai khua i pengkomh zungah hmunhma a khuarmi SAC ralkap le CDF-Matupi karlak kahdohnak a chuah hnu ah khuate cheukhat in khuami hna cu an khua ning in India-Myanmar ramri ah an zaam dih.
“Aizawl khua ah a ummi ralzaam a tam deuh hi cu Matupi lei in a raami an si. Mino le tar tampi an rak phan. Ralkap nih an khua chungah hriamngan in a kah caah an um ngam ti lo. Pum tlamtling lo tar pawl a rak phanmi an i tel. Harnak an tong taktak” tiah Lai khua ralzaam pakhat nih Mizzima ah a chim.
“Fur a tlak hin cun a zual chin lai. Camp chungah chungkhar pakhat le pakhat puan kham in an um hna. Pum tlamtling lo tar hna nih cuka hmun ahcun zulte an kal beh i an chungkhar nih an va thlet tawn. Fur a tlak ahcun a tlamlo taktak lai, a si khawh ahcun an mah pawl hna caah hmundang tein umnak an herh ko”.
Chungkhar pakhat i an fate cu umṭhutnak a har tuk caah vawlei cungah a si khawhnak in a um ruangah pum tlamtling lo ah aa cang tiah a langhter.
January thla ah Matupi peng, Ngalai khuami 10 cu ramlak ah sia an kawlnak ah SAC ralkap he an i tong. SAC ralkap nih hri in an hren hna i an thah beh hna tiah theih a si.
“January thla ah a rak zaami vemi chungkhar pakhat i an fate cu rak zaam a si lio ahkhan a ngandam ko. Atu hmun ahcun a si khawhnak in umṭhut a si caah zeitindik si, Polio a ngei. Ṭha tein thlop manh a si ahcun a dam ṭhan ko lai” tiah Ngalai khuami pakhat nih a chim.
SAC nih hramhram in uknak a lak hnu in Mizoram ah a zaammi Myanmar ralzaam 30,000 leng an si cang i cu chung in minung 8,000 cu Mizoram cozah nih Refugee ID a chuahpiak cang hna tiah theih a si.
About The Author
