All Chin Society Yangon Upa Hna Nih Chin Ramkulh Cozah Bu Ton Biaruahnak An Ngeih Hna

Salai CungCung|2019 March 30| All Chin Society Yangon (ACSY) riantuannak kong he pehtlai in March 29 Chin ramkulh Hluttaw zung ah Chin ramkulh cozah bu ton biaruahnak an ngeih hna tiah kan theih.

“Tutan ACSY lei in Hakha ah kan ratnak a ruang cu, Chin ramkulh Chief minister, Myanmar ram Vice-president Pu Henry Van Thio le Yangon ramthen minister hna bawmhnak thawng in Yangon ramthen cozah nih Yangon ah vawilei hmun a kan pek. Cu hmun cu Chinmi vialte kan i zohkhenhnak caah a si. Kan rian Project hi pakhat hnu pakhat sak ding in timhtuah a si. Tukum chung ah Sing 3000 dih in inn pakhat sak ding tiah timh tuah mi kan ngei. Chin ramkulh chung um dam lomi vialte Yangon ah rat in aa thlawpbul dingmi vialte an tlunnak le zalong tein an um khawh nakhnga, cu lawng si lo in Rakhine ramkulh lei le Sagaing ramthen zong ah Chinmi tampi an um. Cu pawl dam lomi  hna Yangon rak tik umnak caah tiin inn sak kan timh. Cu timh tuahmi pawl caah Chin ramkulh cozah sin fund kan herhnak kong kan chimh hna” tiah ACSY President Rev. Dr. Peter Ngun Za Cung nih The Chinland Post ah a chim.

“Chin ramkulh ah hin riantuantu company tampi le Tender hmumi tampi a um, an mah sin in fund tete an rak pek cio khawh nakhnga lam kan serpiak uh. Cun mizapi zong nih kan theihpiak hna seh tiah kan chim hna. Cun Chin ramkulh cozah lei nih hi kong he pehtlai in tender hmu le company pawl hi hramhram in ti awk an that lai lo caah zatlang nunphung i zohkhenhnak caah a herhmi tete hi an pek khawh nakhnga thawngthanhnak kan in ngeihpiak hna lai an kan ti. Tutan Chin ramkulh minister pawl he tonnak kan ngeih cu cozah lei zong nih kan riantuannak thazaang an pek ngai ko” tiah a chim chap.

Hika ton biaruahnak an ngeih lio video zoh khawh a si. 

Hmun man ngunkhuai le dum kulhnak caah Sing 2500 cu Yangon ummi sin ah an khawlh hna i hi pawl caah hman dih a si cang. Chinmi ramchung ramleng mizaw umnak caah Sing 3000 leng dih in sak dingmi caah hin tubantuk in fund kawlpiak ding ah Chin ramkulh cozah he ton biaruahnak an ngeih hi a si tiah kan theih.

“Chinram chung ah Sing 3000 tling hrim seh kan ti duhnak hi a si lo. April thla chung ah keimah le a dang pakhat hnih ramthumnak lei ah kan va kal lai i fund tete a kan bawmh khawh nakhnga thawngthanhnak kan ve ngei lai. Hi damlo zohkhenhnak umnak inn cu tukum chung ah i lim kho seh ti saduhthahnak kan ngei” Rev. Dr. Peter Ngun Za Cung nih a chim.

ACSY (All Chin Society Yangon) nih pakhatnak ah Sing 3000 dih in mizaw umnak inn, pahnihnak ah Sing 45,000 dih in Hall pakhat sak ding le Sing Thong 100 le Thong 30 dih Hotel sak an i tim tiah tuanvo ngeitu sin in kan theih.

“Sing 45000 dih in sak ding mi Hall caah fund cu Yangon ramthen Chief minister nih fund kan kawlpi hna lai a kan ti. Cun Hotel sak kan timhmi hi cu ramdang lei a rak tlungmi siseh Chin ramkulh minister pawl um khawhnak tiang in kan sak lai. A man cu midang nak fawi deuh in a si lai” tiah a chim chap.

Tutan Chin ramkulh minister he tonnak ah ACSY upa minung 5 an rak tlung tiah kan theih.