Amazon Company Dirhtu Jeff Bezos Cu Forbes Thimmi Billionaires Mirum Bik A Si Than
Aung Aung| 2018 March 7| Forbes Magazine nih kumtin a chuah tawn mi vawleicung mirum bik pawl cazin cu a thanh than i Amazon company dirhtu Jeff Bezos cu tukum zong a rum bik a si. March 6 ah an thanh mi cazin ning in hlan deuh ah vawlei cung mirum bik dirhmun sau ngai a tlaitu Microsoft dirhtu Bill Gate cu a pahnih a si.
Nikum cazin ning in Bezos nih hin Bill Gate hi tam ngai in a rak lonh i mirum bik cazin ah a rak um nain Forbes rian tuantu pawl ruah ning ah Amazon ah Share a lut mi pawl an zor sual ahcun Bill Gate nih a tei than te khawh men tiah an rak damh.
Asinain Amazon i share a lut mi pawl cu zorchuk loin mithmuh hmaitheih tein an karh lei caah kumthum chung Bezos cu mirum bik dirhmun ah a um peng ko. 2017 ah khan Bezos ngeihmi hi US Dollar 90.6 billion a si i Bill Gate hi 90.1 billion a rak si.
Online Shopping Company a simi Amazon company i stock share cu a luan cia thla 12 chung zatuak 59 tiang a karh caah tu ahhin Bezos ngeihmi tangka hi USD 120 billion tiang a phan cang. Bill Gate bel cu USD 90 billion in a hmunh caah Forbes nih an thanh tawnmi mirum bik cazin ahhin a rum bik a changtu an ngeih mi aa thlau ning a hmual fak bik a hung si.
Hi lio ah US President Donald Trump cu a rum bik cazin ah nikum ah khan 544 a rak si nain tu cu 766 a si caah dot 222 bak a tla tiah theih a si. Trump ngeihmi cu USD 3.1 billion a si tiah Forbes nih an thanh i nikum a ngeihmi nak million 400 tluk a ngeihmi a zorchuk tiah an chim.
Facebook dirhtu Mark Zuckerberg cu mirum bik cazin panga nak ah a um.
Forbes nih billionaires mirum cazin a thanhmi hna nih an ngeih mi dihlak hi USD 9.1 Trillion tiang a phan i nikum nak in zatuak 18 tluk a tam deuh tiah theih a si. Forbes cazin ning in billionaires cazin chung ah US minung 585 an i tel in ram khat tein a tam bik an si. A changtu cu Tuluk in minung 373 an si.
Ref: Duwun
About The Author
