American nih Covid-19 thlopnak caah lakhruak hmanding sii a fehter cang

Gilead Science Company nih a sermi Remdesivir sii cu lakhruak caan karlak Covid-19 mizaw thlopnak (emergency use of experimental drug) caah American Food and Drugs Association (FDA) nih a fehter cang tiah theih a si.

President Trump zong nih cawn ninga ni ah hman chung ding in a thanh cang caah Remdesivir sii cu a pakhatnak bik Covid-19 zawtnak thlopnak caah phungning in hman khawh mi sii ah a cang.

Ninga ni ah President nih Media pawl sin biachimnak a ngeih lio ah Gilead Science CEO Daniel O’Day aa tel ve i, “Hi sii hman khawh ding ah kan hmuhchuah mi nih kan dirhmun tampi a thanchoter lai,” tiah Trump nih a chim.

“Avoi khatnak bik siizung ah kan sii phungning in hman khawh a si cang caah kan i lawm. Hi sii ruang ah mizaw harnak an tong lai lo timi ruahchanhnak kan ngei,” tiah Gilead Science CEO Daniel O’Day nih a chim ve.

Remdesivir sii cu aluancia caan ah Ebola zawtnak thlopnak caah rak sermi a si nain Ebola mizaw caah a rak thathnem tuk lo an ti.

Covid-19 thlopnak caah hmanding sii tampi cu ACTT (Adaptive Covid-19 Treatment Trial) timi mizaw hneksaknak (Test) phung in mizaw minung 1000  leng an test hna hnu ah Remdesivir sii hi a tha bik tiah an hmuh chuah cu a si.

Minung 1000 renglo an hneksaknak hna tik ah Covid-19 zawtnak a damh kho ve mi a dang sii pawl nakin 31% rang deuh in a damter hna tiah an hmuh.

US ngandamnak lei hruaitu le bochanmi Dr. Fauci nih, “Hi sii hmannak in mizaw rianrang deuh damnak lei an panh ko. A si kho bik mi sii a si,” tiah a chim ve.

A peh i, “Hi sii nih khuaruahhar (marical) in mi cu a damh lo nain, hman awk ah fehter khawh mi a si ko (proof of concept),” tiah a chim.

Cucaah Covid-19 damnak caah a bingte in sii an ser chuah khawh hlan lo chung cu Gilead Science nih Ebola thlopnak caah a rak sermi Remdesivir sii cu phungning te in hmanchung a si cang lai.

Ref: The Guardian, AFP, New York Times

Na ruahning rak langhter ve.. (Leave a comment)

%d bloggers like this: