ANP; Mrauk U Kahdohnak In  A Thimi Le Aa Hliammi 50 Leng An Si Cang

Salai CungCung| 2019 March 27 | I kahdohnak ruang ah Rakhine ramkulh Mrauk U peng chung lawng in hliamhma tuarmi, a thimi le a tlaumi zapi hi minung 50 leng an si cang tiah Arakan National Party (ANP) nih a dirhmi Dothlattu commission nih an chim.

A thimi, hliamhma tuarmi, a tlaumi zeizat an  si cang timi fiangtein chim khawh a si rih lo nain Mrauk U pengkhat chung lawng ah minung 52 an si cang tiah commission chungtel U Tun Aung Kyaw nih a chim.

“Bomb lamh sual ruang ah a ke kiakmi, meithal kah sual ruang ah a thimi, hliamhma tuarmi, a tlaumi tiin an zapi minung 52 an si. Zeitindah an thih ning a si timi cu kan hlat liopi a si” tiah a chim.

Hi chekfelnak commission nih March 27 ah Mrauk U peng chekfelnak an tuah mi chung in an hmuh mi a si.

Meithal in a thimi pin ah an tlaih i thlah ti lomi, khualeng riantuannak in inn phan ti loin a tlaumi zong tampi an um. Cun Mrauk U pengkhat chung te lawng ah ralzaam 7000 hrawng an um. Hiti an tlikzaamnak cu khuachung le sang chung ah meithal in an hro hna caah a si tiah kan theih.

“Ralzaam camp ah kan va kal i kan hal hna tikah meithal in an hrocer hna ruang ah a zaammi tampi kan hmuh hna” tiah Tun Aung Kyaw nih a chim.

March 27 chekfelnak kal lio ah hin tlangsangpi cung lei in bomb puah thawng le meithal thawng zong kan theih tiah U Tun Aung Kyaw nih a chim. Cun Mrauk U khua hi  zing lei lawng ah chikkhat chawdawr an on i zaanlei sang ahcun an khar dih. Khuachung cu a dai thipthep ko tiah khuami pakhat nih a chim.

ANP chekfelnak commission nih an chekfelmi phichuak cu rampi ruahnak petu Daw Aung San Suu Kyi, rampi president le kawl ralkap bawizik sin ah ca in an pek lai tiah theih a si.

Ref: 7day Daily News

Na ruahning rak langhter ve.. (Leave a comment)

%d bloggers like this: