April Thla Chung Chinram Ah Peng Pahnih Hunnak An Tuah Lai

0

TCP-Kalay| 2019 April 3| Chinram Falam peng chung Wai-bu-lah le Kanpetlet peng chung Cin-dwe khua cu April thla chungah Peng (Myo) hunnak an tuah lai tiah kan theih.

Chinram Chief Minister Salai Lian Luai cu  March 21 Falam peng Waibulah khua a tlawnlio khuami hna sin ah a chim.

Waibulah khua hi Kalaymyo peng Natchaung khua in Falam lei kalnak lamkam um khua a si i sang 4, Inn 100-200 karlak um mi a si. 2018 kum August 10 ah Myanmar ram President zung nih khua in Peng (Myo) pek ding in thawngthanhnak a rak tuah cang. 2018 kum September 30 ah Vice President Henry Van Thio Chinram a rak tlawn lio ah Peng hunnak ngeihding in timhtuahnak a um nain relremlonak ruangah a tuah lo.

Waibulah Uktu U Ngun San nih, “March 21 ah Chief Minister le an nu peng uknak zung an rak tlawn lio ah CM nih a chim. Peng hunnak ding ah tangka(bawmhhalnak) zong kan tuah cuahmah le sing 60 hrawng a dih lai ti kan zumh. Mah zat tangka cu kannih caah fund kawl a har ngai ko nain Peng hmuh kan duh caah tuanvo kan lak ko lai” tiah a chim.

Cun, Kanpetlet peng Cindwe peng hi khuali fonh; Phungtui, Thangkung, Hupphungcin le Cindwe fonh in Cindwe peng tiah 2018 kum December 14 ah Myanmar President zung cakhenh number /509(51/12) in thawngthanhnak a tuah. Cindwe khua in Kanpetlet  hi Meng 57 a hlatnak ah a um i inn 200 -300 karlak an um.

2018 kum October 26 ah Daw Aung San Suu Kyi Kanpetlet a rak tlawn lio ah Cindwe khua cu Peng pek ding in hnatlak pinak a ngei. Cindwe khua cu 1970 kum ah Peng a rak si bal nain 1974 Upadi ruangah Khuate ah thumhthan mi khua a rak si.

Chinram ah Pengkulh 9 an um. Tedim pengkulh chung ah Khaikam peng, Tonzang pengkulh chung ah Cikha peng, Falam pengkulh chung ah Rihkhawdar peng, Waibulah peng, Thantlang pengkulh chungah Hnaring peng, Matupi pengkulh chung ah Lailenpi peng, Rezua peng, Kanpetlet pengkulh ah Cindwe peng, Mindat pengkulh chung ah Maqui-innnu peng le Paletwa pengkulh ah Sami peng an um tiah theih a si.

About The Author

Na ruahning rak langhter ve.. (Leave a comment)

%d bloggers like this: