Arcirh Khua Minung Pathum Nih Pu Hrang Hip Te Naatum Athli In An Thahpiak Hna

0

February 18 zarhpi ni ah Pu Hrang Hip te naatum cu Thantlang peng Arcirh khua minung pathum nih a thli in an thah piak hna caah minung pakhat thonginn a phan tiah thawng kan theih.

 

Hi kong he pehtlai in naa ngeimi hna Pu Hrang Hip a nupi Pi Ngun Bor nih “February 18 zarhpi ni chun ah Arcirh khua minung pathum nih Lahva kuang ah naa an thah mi Sopum khua mi caw a kawl mi nih an hmuh hna caah thilsining an kan chimh i kanmah naa si hnga maw tiah a ran nak in naa ngeimi dang he kan pa le cu an kal tikah, a sa an chumh lio mi an hmuh. A kutke le a lu cu an rak hlonh dih i a sa dang cu songkhoi ah an rak chiah. Minung cu kan bawh hna i a thattu minung cu zurit bu in an rak zuang. Kanmah an kan hmuh tikah pakhat cu a zam i pakhat cu kan tlaih manh caah Thantlang thonginn ah an hren chung. Hi lio ah minung pakhat hi a sa cu khuachung ah an zuar ter lio a si” tiah The Chiland Post ah a chim.

 

Palek lei nih naa an thah mi lu le minung cu sakhan ah rat pi u an ti hna caah an tlaih manh mi minung pakhat le naa lu cu thonginn an a um lio a si.

 

“Palek nih Lai mi cu Laiphung tein i len le i kai a si caah tha tein kan in liamh ko hna lai an in ti hna ahcun ngaihthiam ko hna uh an kan ti. Kanmah lei zong nih an sualman cu ing hna seh ti kan duh tuk ve ko hna. Khrihfa nunzia he aa kalh ngai hoi. Anmah nih a man ning tein kan in liamh ko hna lai an kan ti ahcun nihnih chung caan kan pek hna, hi chung ah an rat lo le taza kan cuai (a hmuh kan tuah) cang hna lai” tiah Pi Ngun Bor nih a chim chap.

 

Pu Hrang Hip te dawng cu Naa tum pahnih, a nu pahnih le a fa pakhat an ngei i a tu bantuk in naa tum pakhat cu an thah piak hna hi a si.

About The Author

Na ruahning rak langhter ve.. (Leave a comment)

%d bloggers like this: