ASEAN MP 132 Nih ICC Ah Kawlram Sualphawt Biacaih Ding An Duh
The Chinland Post: 2018 August 24| Association for Southeast Asia Nations (ASEAN) timi ram 10 komh chung in phungsertu MP 130 leng nih UN Security Council sin ah Ramkomh Kawlram cozah nih Rakhine Ramkulh i nuhrin covo an buarnak ruang kong he pehtlaih in International Criminal Court (ICC) ah sualphawt biacaih (tazacuai) ding in an duhnak cu an langhter.
A bik in, Rakhine Ramkulh ah Ramkomh Kawlram cozah nih Rohingya hna cung ah sual an tuahmi kong he pehtlai in Kawlram cu ICC ah sualphawt biacaih (tazacuai) ding ah an duhnak an langhter nak a si.
“Kum khat zong a tling cang. Ramkomh Kawlram nih miphun thleidannak le nuhrin covo buar in hramhram in Rohingya a tuahtonak hna kong he pehtlai in a tu bantuk in kan duhnak kan langhternak a si tiah minthutmi Malaysia in phungsertu (MP) le tulio ASEAN Parliamentarians for Human Rights (APHR) ah lutlai simi Charles Santiago nih minthuttu zapi 132 aiawh in a chim.
Asinain, Ramkomh Kawlram nih Rome Statute hnatlaknak min a thut lo caah, ICC zulhphung tang in sualphawt biacaih (tazacuai) khawh a si lo. Cucaah, UN Security Council lawng nih a tuah khawhmi a si.
Tutan Kawlram cozah ICC ah sualphawt biacaih (tazacuai) ding in min a thumi phungsertu (Member of Paliament, MP) hi Indonesia, Malaysia, Phillipines, Singapore, le ASEAN ah ngaithlaitu dirhmun a simi Timor-Leste in an si.
Ref: ASEANMP.ORG
