Atu Kan I Tonmi Nih Ramhnih Karlak I Thennak A Um Ti Lo Timi Hmelchunhnak A Langhter; President Moon Jae-in

0

City Hunter| 2018 April 27| North Korea ram khawngtawn uktu Kim Jong-un he April 27 zingka ton biaruahnak an ngeih lio ah South Korea President Moon Jae-in nih tutan ramhnih hruaitu kan i tonmi nih ramhnih karlak ah i thennak a um ti lo timi daihnak hmelchunhnak a langhter tiah Kim Jong-un sin ah a chim.

North Korea ram khawngtawn uktu Kim Jong-un le South Korea ram President Moon Jae-in cu ramri raldaihnak hmun Panumjom ah April 27 zingka ahkhan tuanbia thar tialnak in tonnak an ngei kho.

South Korea President Moon Jae-in nih, “Nihin hi ramhnih hruaitu upa nih a voikhatnak bik ramri kan lonh ni a si. Nihin cu kan ramhnih caah tuanbia thar kan tial ni a si. Mah nihin ram hnih karlak i thennak a um ti lo timi hmelchunhnak le daihnak hmelchunhnak a langhter. Atu bantuk in hika i ton ding ah raltha te in bia na chah ngammi cung ah upatnak le hmaizahnak kan pek. Kan ram hnih karlak buainak le kan tonmi vialte tuanchuah than khawhnak ding cu kanmah pahnih lian cung ah aa hngat” tiah a chim.

North Korea hruaitu Kim Jong-un zong nih an i ton cangka, “A luancia kum 11 lio ahkhan kan ramhnih nih lungtlinnak thate in kan rak ngei ko nain kan rak pehzulh kho lo. Cu ruang ah tuanchuah lo, pakpalawng siternak in caan vialte kan limter dih. Kan ramhnih mizapi nih an kan ruahchannak a sau tuk cang. A luancia caan kha fimchimtu ah hmang in tutuan kan i tonnak cu sullam ngeite in kan hman lai. Tonnak kan ngei lengmang lai. Tutan na sin ka rat hi atu thawk in tuanbia thar tial ding ah ka rat hi a si” tiah a chim.

ramhnih hruaitu upa ton biaruahnak an ngeih lio ah President Kim Jong Un cu ramri lonh i South Korea ram chung lut ding in a sawm. Cu tikah Kim Jong Un cu Moon Jae In nih South Korea ramri in a don. Kim Jong Un nih South Korea ramri vawlei a hun lamh hnu ah Moon Jae In cu Kim Jong Un nih a hruai i North Korea ramri vawlei a hun lamhpi tak ve. Hruaitu an pahnih in mirh ngai le mitmai panh taktak in an i chawn, an kut an i tlai. An pawngkam a ummi vialte kutbeng le lawmhnak (nihnak) thawng in a khat.

North Korea ram hruaitu Kim Jong Un hi 1950-53 kar Korea ralpi a thawh hnu in South Korea vawlei a laam hmasa biktu North Korea hruaitu ti in tuanbia thar tialtu a hung si. Korea ralpi a thawh hnu kum 65 hnu ah atu bantuk in North Korea ram hruaitu Kim Jong Un nih South Korea ram vawlei a hmasa bik a lamh hi a si.

Kim Jong-un nih South Korea ramri a lamh/ a tan lio

Kum 10 chung ah a hmasa bik North Korea le South Korea ram hruaitu upa ton biaruahnak an ngeih hi a si. South Korea President Moon Jae-In kha a hlankan in a phan hmasa.

North Korea hruaitu Kim Jong Un cu June thla thawkka ah American President Donald Trump he zong ton biaruahnak ngei ding in hnatlaknak an ngei cang.

Moon Jae-in le Kim Jong-un ton biaruahnak an ngeihmi hi American President Donald Trump he an i tondingmi caah lamkaltu karhlan pakhat a si tiah an ruahdamh. Moon le Kim biaruahnak an ngeihmi zong hi thatnak lei hram a bunh lai tiah ramkhel thiamsang tampi nih an zumh.

“Nihin ah Moon le Kim i tonnak a tlamtlinnak ding South Korea cozah thazaang chuahnak le an i zuamnak cu ka lawmhpi taktak hna. I tlaihhrennak le nuclear kong ceihmainak an ngei lai tiah ka ruah. Asinain an biaruahmi phichuak hi zeidah a lawh lai timi ka hngal kho rih lo” tiah Japan cozah bu in tuanvo ngeitu minister pakhat nih a chim.

Ref: 7Day Daily News, NPC News, DVB Burmese

About The Author

Na ruahning rak langhter ve.. (Leave a comment)

%d bloggers like this: