Aung La Nsang; Award Phunhnih Coding Min Tarmi I Kaa Tel Ve Caah Vote Ka Pe Cio Uh
TCP-Hakha| 2019 April 30| One championship nih a tuahmi MMA zuamnak ah aa telmi Aung La Nsang cu Fighter Only Magazine nih a pek dingmi World MMA Awards laksawng phunhnih coding min tarmi ah aa tel ve. Cu ruang ah Aung La Nsang nih vote rak ka pe cio ve uh tiah mizapi sin ah sawmnak a tuah.
Vote hi online in thapetu mizapi nih pek a si. Hika https://www.worldmmaawards.com/vote/ah Aung La Nsang vote pek a duhmi paoh nih pek khawh a si.
Award co kho ding in Aung La Nsang a min an tarnak award phunhnih cu; 1). Charles “Mask” Lewis Fighter of the Year le 2). International Fighter of the Year an si.
Atu pek dingmi Charles “Mask” Lewis Fighter of the Year hi 2009 ah a thi ciami Charles Mask conglawmhnak caah 2010 kum thawk in Charles “Mask” Lewis Fighter of the Year ti min thlen in pekmi minthatnak laksawng a si.
Hi laksawng co dingmi a donghnak bik min tarmi minung 5 lakah Aung La Nsang cu UFC fighter hna lakah aa tel ve.
“Hi laksawng cu thapetu mizapi thimnak hngatchan in pekmi a si. Keimah tu nih cun ramdang mi nih vote a kan pekmi nakin ka chuahkehnak ram (Myanmar ram) mizapi nih vote na kan pek ding ka duh deuh. Hi minthatnak laksawng nih ramkip nih an ka hngalh deuh lai pin ah kan ram (Myanmar) zong mi tampi nih an hngalh deuhnak ding a si lai caah vote rak ka pe cio uh” tiah social media cakuang ah sawmnak a tuah.
“MMA ah limhang a ngan taktakmi World MMA Awards peknak ah laksawng hmu ding in ka min aa tel ve. Fighters Only Magazine nih a tuahmi hi laksawng peknak hi ramkip ah a ummi MMA zuamnak chung in a thiam bikmi thim an si. Cu chung in mizapi nih vote in an kan thim lai. Cu ruang ah ka min aa telnak award hna hi “Vawleicung pumpululh zuamnak i Sui Kedan (Golden Shoe)” pek a si bantuk in MMA celhthiamtu hna caah man a ngei taktakmi laksawng a si ve” tiah Aung La Nsang nih a chim.
Aung La Nsang min cazin aa telnak International Fighter of the Year laksawng hi America rammi a si lomi fighter pawl thim in pekmi a si caah hi cazin ah America fighter an i tel lo.
2017 kum Fight of the Year caah a thiam bik laksawng cu Newzealand ram ah a chuak i Australia rammi sinak a lami UFC Middleweight champion Robert Whittaker nih a co. Khabib tu cu 2016 kum ah a rak co. Charles “Mask” Lewis Fighter of the Year laksawng cu minthang McGregor nih 2015 le 2016 kum he kumhnih peh in a co.
Ref: Duwun
About The Author
