Aung La Nsang Nih International Fighter of the Year Award A Co
The Chinland Post| 2019 July 4| Kachin miphun Aung La Nsang cu World MMA Awards 2019 laksawng peknak ah International Fighter of the Year award cu (UFC) MMA sunghnak puai ngei lo in champion Khabib a hun lonh caah atu bantuk in a co hi a si.
England hrambunh Fighters Only Magazine nih a tawlrelmi World MMA Awards 2019 laksawng peknak cu July 6, American ram ah tuah ding a si i award phun 22 pek an si lai.
Aung La Nsang cu International Fighter of the Year award cu UFC- MMA ah sunghnak puai ngei lo in champion cotu Russia rammi Khabib telh in UFC fighter Usman, Adesanya, Mousasi lonh in atu award a hun conak hi a si.
Award co kho ding in Aung La Nsang a min an tarnak award phunhnih cu; 1). Charles “Mask” Lewis Fighter of the Year le 2). International Fighter of the Year an si. Hi pahnih chung in International Fighter of the Year lawng a co.
“MMA ah limhang a ngan taktakmi World MMA Awards peknak ah laksawng hmu ding in ka min aa tel ve. Fighters Only Magazine nih a tuahmi hi laksawng peknak hi ramkip ah a ummi MMA zuamnak chung in a thiam bikmi thim an si. Cu chung in mizapi nih vote in an kan thim lai. Cu ruang ah ka min aa telnak award hna hi “Vawleicung pumpululh zuamnak i Sui Kedan (Golden Shoe)” pek a si bantuk in MMA celhthiamtu hna caah man a ngei taktakmi laksawng a si ve” tiah Aung La Nsang nih a min an rak tar cangka media sin ah a rak chim.
2017 kum Fight of the Year caah a thiam bik laksawng cu Newzealand ram ah a chuak i Australia rammi sinak a lami UFC Middleweight champion Robert Whittaker nih a co. Khabib tu cu 2016 kum ah a rak co. Charles “Mask” Lewis Fighter of the Year laksawng cu minthang McGregor nih 2015 le 2016 kum he kumhnih peh in a co.
Ref: 7Day News, Duwun
About The Author
