Aung Lah N Sang Cu Kawlram Ralkap Bawizik Le KIA/O Nih Sing 300 Laksawng An Pek
TCP-Thantlang| 2018 Tho 28| MMA One Champion-ship ah Karaki nih a zuamcawhmi Aung Lah N Sang cu Kawlram ralkap lutlai Gen. Min Aung Hlaing nih sing 100 le KIA/O nih sing 200 a zapi sing 300 laksawng an pek tiah theih a si.
October 26 Yangon khua ah Aung Lah N Sang le Karaki an i thonghnak chungah a caan khatnak (round khatnak) hmanh a dih hlan minute 2:21 second ah Kachin miphun Aung Lah NSang nih a tei caah avoi hnihnak MMA One Champion-ship taisawmh cu a huhphenh than khawhnak hi a si. An i thongh a thaizing- October 27 Rose Garden Hotel ah Ralkap lutlai nih upat peknak roca le tangka sing 100 cu tuanvo ngeitu hna nih Aung Lah NSang sin ah an pek chanh.
Aung La nih a vorhlei kuttum in teng lak bakin a thongh. Aa tengh hnu ah a kehlei kumtum in voi 4 bak a den rih. Mah tiang cun Karaki nih voi 1 hmanh a let kho lo.
Aung La nih, “hmasa bikah Pathian cungah kaa lawm,” tiah Pathian a thangthat. “Pahnihnak ah MMA thongh ka cawnnak Hard Knocks 365 cungah kaa lawm. Cun, Myanmar mi vialte nan dihlak cungah kaa lawm tuk. Kaan dawt tuk hna. Hi bantukin thazaang nan ka pek caah kaa lawm tuk” tiah a chim.
“Aung Lah NSang cu upat awk aa tlak taktak caah a tu bantuk in laksawng ah tangka sing 200 kan pek cu a si. A mah cu mino hna caah zohchun awktlak pakhat zong a si. Kachim miphun ca lawng si lo in Kawlram chung mino vialte hna zong nih a mah zoh in i zuamnak lungthin an ngei ve lai” tiah KIA/O lei tuanvo ngeitu nih a chim.
Aung Lah NSang nih a voikhatnak June 29 Yangon thiam ah Japan pa he an rak i thong i (MMA One Champion-ship) a taisawmh cu avoi khatnak a rak runven khawh i a tu in a voihnihnak a taisawm a runven khawh hi a si. Kum 33 a si mi Aung Lah NSang cu MMA chungah voi 34 aa thong i voi 24 a awng, voi 10 a sung bal tiah theih a si.
Ref: 7day News
About The Author
