Aung San Milem Hakha Ah Phun Lo Ding Hakha Zatlang Bu Nih Bia An Chah

The Chinland Post | Sep. 29 — Hakha ah Aung San milem phunnak kong he pehtlai in aluan ciami September 28 ah Hakha Zatlang Bu (Hakha Civil Society Network) hrihawhnak in Hakha ah Aung San milem bunh ding duh le duh lo kong an ceihmai i kan duh lo tiin biachahnak an tuah tiah thawng kan theih.
Hi biachahnak cu tonpumhnak a kai mi nih an hmuhning an chimh dih cio hnu ah bunh ding duh le duh lo kong he pehtlai in thimfung thlaknak an tuah i duh lo nih a tei hi a si. Thimfung an thlak hnu ah duh lo nih thimfung 13, a duh nih thimfung 8 le thimfung a thla lomi pahnih an um tiah kan theih.

Tonpumhnak a kai ve mi Fidi Foundation in Director Salai Mang Hre Lian nih,”Aung San milem ah a telmi dihlak nih ramkhel timhnak a um timi cu an cohlang dih. Mah chung ah a tha maw tha lo tiin hmuhnak i dang cio a si. Mino tam deuh nih an duh lo i, upa tam deuh nih an duh,” tiah The Chinland Post ah a chim.

A peh i, “Kawl cung ah tlangcung ka lung a fah lio a si. Biaknak in an kan namneh. Fimcawnnak in Kawl tuanbia le sining lawng a kan cawnhter i a kan namneh. Hriamtlai vialte kan khuaram ah rat hnawh in an kan tuk. Tlangcungmi nih hriamnam buainak kan tuar i, ral kan zam, kan thi tikah Kawl cozah cung ah tlangcungmi lungfahnak a dih rih lo. Cu hmanh a dih hlan ah Aung San milem tlangcungmi ram ah phun chap an timh tikah lungfah damter si lo in zualter tu hi a lo. Mah hi NLD zong nih an ruah ding a si. Aung San milem tlangcung ah bunhding in nuncan ziaza in a hmanmi tuahsernak a si lo. Tuanbia zoh zong in hman lo. Ramkhel mit zong in a hman lo i, chunglei tuarnak (Morally) zong in a hmanmi a si lo,” tiah a hmuhning a chim.

Aung San milem phun kong ah Kaya ram ah Sandah an piah bu in an phun caah mino 6 thongtlak an tong i atu tiang an chuah hna lo. Cun Kachin zong ah mipi theihter lo in an phun caah mipi an lung a fak i Aung San milem cu a phunphun in hrawh an timh i, tinbawsii hna an toih piak hna.

Mon ramkulh zong ah Tanlwin hleidonh cu Boyoke Aung San hleidonh tiah a min an thlen caah Mon mipi a thong nih duh lonak an langhter bal.

Na ruahning rak langhter ve.. (Leave a comment)

%d bloggers like this: