Aung San Milem Kong Lamzawh Lo Ding In An Leet I Thil Phunthum A Thar In Nawlngeitu Sin Ah Ca An Chiah Than
Salai Elvis| 2018 Tho 10| Thantlang khuachung ah Aung San milem chiah timhmi kongah zatlangbu hna nih October 15 ni ah duhlonak lamzawh dingin timhtuahnak an ngeihmi cu cozah lei rianngeitu hna he lamzawh lo ding in hnatlaknak an ngei than.
Lam zawhdingin zungah ca an chiah, ni hnihnak October 9 ah zatlangbu hna le cozah zung rianngeitu hna tonnak an ngeih hnu ah cozah rianngeitu hna nih milem chiah lo dingin biakamnak le lamzawh than lo dingin an nawl than hna caah a tubantuk in an let hi a si. Asinain October ni 9 zan ah zatlangbu hna tonnak an ngei i lamzawh ngol ding le biafunnak an ngeihmi phunthum tu cozah zung ah ca an chiah than hi a si.
“Lam zawh lo ding in Cozah lei rianngeitu hna nih an kan nawl than caah lam zawh cu kan leet. Asinain, zatlangbu kip hna nih biafunnak kan ngeih thanmi phunthum tu cu kan pek than hna i lamzawh dingin ca kan chiahmi zong kan laak than lai” tiah CWSO hruaitu Thluai Nu nih TCP ah a chim.
Biafunnak an ngeihmi phunthum cu; Aung San milem kan tuah bak lai lo tiah bia na kan lehmi cungah kan i lawm. Bogyoke Aung San pangpar dum timi min cu mizapi tlawnlennak tiin min na kan leetpiak than caah kan i lawm timi le zeibantuk milem sernak kongah a bu in siseh pumpak in siseh, a tuahhnawh channak aruang le a konglam cu zaukphung ning in mizapi sin ah ahlankan thlakhat chungah theihternak tuahta hmasa ding le cu i ruahnak a lak ta lo ahcun kan doh peng lai. Hi biafunnak kan ngeihmi nan kan cohlanpiak a si ahcun October 15 duhlonak langhter dingmi kan in ngolpiak hna lai’ timi phunthum cu October 10 ah cozah rian ngeitu hna sin ah ca an pek than hna hi a si.
“Thantlang penguk zung lutlai changtu nih zatlang bu upa he kan i tonnak ah Bogyoke milem cu kan tuah hrimhrim lai lo a kan ti cang” tiah TSC hruaitu Salai Van Tha Thang nih a chim
“Thantlang khua boruak hi chia hlah seh ti kan duh caah le mi pakhat duhlonak langhter le mizapi nih duhlonak langhter timi zong kan duh lo caah nan duh ning tein kan in tuahpiak hna lai. Cucaah duhlonak langhter ve hlah u kan ti hna i October 9 ah zatlangbu hna an i ton hnu October 10 ah phone chungin a tha ko tiin lungtling tein an kan leh cang” tiah sipin Committee Pu Ngun Hram nih TCP ah a chim.
About The Author
