Aung San Zuk Lem Kaya Ramkulh Chung A Luhlo Nakhnga Mino Hna Nih Zan Var In An Hngah

TCP-Online| 2018 July 11|  Kaya ramkulh khualipi Loikaw ah chiah an timhmi Aung San zuk lem cu Kaya ramkulh chung hrim a luhlo nakhnga Loikaw mino hna nih July ni 9 ni khan ramri ah chun zan in hngah hram an thok.

Kaya ramkulh cozah nih Loikaw khua ah Aung San zuk lem cu chiah dingin timhlamhnak an ngeih caah Loikaw mino (30) hrawng nih Shan ramkulh le Kaya ramkulh ramri ah an hngah hna hi a si.

“Aung San zuk lem hi an van put cun kan kham lai. Lam cung ah kanmah Mino hna nih kan kham lai, kan thu lai. A hrawh bel cu hrawh kan tim lo” tiah lam a kham vemi mino pakhat nih a chim.

Kaya ramkulh Loikaw ah Aung San zuk lem cu ramkulh cozah lei nih chiah an timh i July 7 ni khan biaruahnak an rak ngei. Nain dulotu an um caah a tlam a tling kho lo i July 20-30 kar ah ceih than ding in an ti.

Aung San zuk lem chiah ding kongah Kaya mino hna nih cun an duhlonak le a herhlonak kong pawl mipi sinah ca an phawt. Hiti ca a phawmi mino 11 hna cu Loikaw penguk zung nih pohmah 505(b)(c) in sual an phawt hna.
Ref; The Voice

Na ruahning rak langhter ve.. (Leave a comment)

%d bloggers like this: