Australia Ah Cozah Tlai Liomi Liberal Nih Teinak An Hmuh; Chin Upa Tampi An I Lawm
The Chinland Post| 2019 May 19 – Kum 2019 May 18 ah tuahmi Australia ram pumpi thimnak ah, a tulio cozah tlaitu a simi Scott Morrison nih hruaimi Liberal Party nih teinak an hmuh than tiah theih a si.
Atu lio cozah, Liberal party nih hruaimi nih teinak an hmuh caah Chin miphun chung in upa tampi nih an lunglawmhnak zong an langhter.
Teinak an hmuhmi kong ah, Australia Prime Minister Scott nih, “khuaruahhar thil a cang timi hi ka zumh zungzal. Atuhi, khuaruahhar thil a cang. Zeitluk in dah Australia hi that, cun, zeitluk in dah Australia miphun hi kan that? Ka lawm. Keimah le ka cozah, keimah ka hruaimi phu hna nih kan ruahmi cu nanmah caah a si. Tuzaan hi keimah caah a si lo, Liberal party ca zong ah a si lo. Tuzan hi Australia miphun cozah a zumtu, a zum ngaimi kan zapi caah a si. Kan chim bantuk in kan tuah taktak lai. Cun, teinak kan hmuh caah kan i lawm” tiah thimfung relmi a fian zaan ah a chim.
Liberal party nih teinak an hmuh lai timi a fian cangka in Laimi hruaitu upa tampi zong nih lunglawmhnak langhternak cu Facebook cung ah an tial cio.
Naite 2018 December ah Australia Prime Minister a tongmi CHRO Lubik Salai Bawi Lian Mang nih, “Congratulations to Prime Minister Scott Morisson and Liberal Party of Australia, Prime Minister Scott Morisson le Australia Liberal Party pawl nih rampumpi thimnak ah tei nak an hmuh caah ka lawmh pi hna. Prime Minister Morisson le Liberal cozah nih vawlei cung ralzam pawl caah Australia cozah nih zawnruah nak in an tuahmi 202 Global Humanitarian Visa tiah an timi cu a dihlak in Chinmi caah an kan chiah piak. Ram pakhat nih miphun pakhat kha a minthlir in nanmah kha papek in kan in zohkhenh kan in lak hna lai ticu a sunglawi ngaingai mi a si” tiah a tial.
Cun, “Liberal cozah hi Cabinet Level ah Australia cozah nih Burma ah education le poverty reduction ca i kum chiar 80 Million hrawng nan bawmhmi cu Chin State ah rak kan ruah piak u tiah kan chimh cangmi hna an si. Hmai lei ah bia kan iruah lengmang lai tiah an kan ti caah an mah cozah an hmunh mi hi kan caah a biapi ngaingai mi a si” tiah a chapchih.
A dang Australia i Melbourne khuapi ah Chin miphun in hruaitu saupi a rak tuanmi Salai Lian Ding Hmung zong nih lawmpinak cu hitin a tial.
“PM Scott Morrison cu Australia tuanbia ah mi tampi nih unwinnable election (tei ding ah ruah bak lo mi thimnak) ah teinak a hmu mi roling PM ah a cang. Chinmi nih a hmasa bik rak ton khawh mi Australian Prime Minister a si. Australia ramhuap Chin Communities pawl a hmasa bik i tonnak ACF Conference ah siseh, Chin Hakha VCE hmuhnak kong ah siseh lawmhnak ca a rak kan kuatu a rak si”.
Cun, a biapi in Chin miphun le Australia Liberal hruaimi cozah he pehtlaihnak sertu a si tiah ruahmi Pu Renny Ceu Lian Mang zong nih a lunglawmhnak cu a langhter;
“Tutan election ah Chin miphun kan pa le kan bochanmi hna hruaitu ceukhat catialmi le comment pawl cu Senator Dean Smith nih a hmuh tik ah a khuaruah a har ngai. Chin miphun nih cun nan kan tanpi dih lai tiah pei ka ruah cu a ti. Chin miphun a tam deuh nih 98 % kan nin tanpi ko 2% nih cun lai a rel lai lo. Vawlei cung phung a si ko ka ti tiah Senator Dean Smith a lehnak cu a langhter.
“Chin miphun nih thla nan kan campiak nak le nan kan bomhnak cung ah ka lawm tuk CHRO le ACF upa pawl hna he Chin miphun caah bia tak te in rian tuannak kan thawk than cawlh lai tiah Senator Dean Smith nih a chimhmi zong mizapi sin ah a pumpak Facebook in a hun thanh.
Australia rampi thimnak a ningpi in a fiang dihrihlo nain atu ning in cun Liberal Party nih cozah an hruai than dingmi a fian khan a si cang.
Cozah ser khawhnak ah thutnak 76 a herh. Cucu, Liberal nih 75 an hmuh cang, zatuak in 76% an hmuh cang. Labour nih thutnak 67 lawng an hmuh rih.
Australia ram ah, an phung ning in thimfung thlaklo a ngah lo. Thimfung thlaknak nawl a ngeimi paohpaoh thlak dih ding a si. Tutan thimfung a thlami hi 16.4 million (nuai) an si tiah BBC nih a tial.
Cc: BBC, Salai Bawi Liang Mang, Lian Ding Hmung, Renny Mang (Fb/Private)
