Australia Ah Myanmar Ethnic Communities Network An Dirh
TCP-Hakha| 2019 August 5| Chin Community of Western Australia hruainak in a voikhatnak “Burmese Ethnic Communities Consultation Meeting” cu Chin Community Office ah August 3, 2019 an tuah kho tiah kan theih.
Kanmah le community cio in aiawhtu hna; Arakan (Rakhine), Chin, Kachin, Karen le Mon hna kan itel kho. Karenni (Kayah) le Shan hi kan sawm ve hna nain community an dirh rihlo le milu an tlawm rih caah an hung itel kho rihlo. Theihpitu le dirhkamhtu ah Tlangcungmi a kan dawtu Scott Johnson le Jeff Fullelove hna nih an kan telpi. Saupi ceihkhanti hnu ah “Myanmar Ethnic Communities Network” timi min pek in, hmailei ah riantuanti dingin hnatlaknak kan ngei kho. Ramchung le ramleng ah a herhningin riantuan ding timhtuahnak kan ngei.” tiah hi bu dirhnak ding a si khawhnak hnga aa zuamtu le Chin Community of Western Australia, Executive Director Salai Ram Tinthei nih a Facebook ah a langhter.
“Hi kong he pehtlai in Sep 14 ah meeting kan auh than i, khi tik ah kan riantuanning le structure pawl kan confirm lai. Minung 5 tuanvo an kan pek. Community 1 ah minung 1 cio thim kan si i mah nihcun next meeting ah a herhmi kan suai lai. Australia Kawlrammi tuanbia ah a voikhatnak meeting le bukomh a dirh hmasabik kan si. Hi dirhnak ah kumkhat le cheu bak kaa zuam ve. A fawilo, ruahnak hna a akhat cio lo, an imanh caan hna aa khat lo i. Kum 1 le cheu bak kan i zuam tikah lungsau hau ko” tiah Salai Ram Tinthei nih The Chinland Post ah a chim.
“Kum saupi mahle community cio in kan tuan hna. Community pakhat le pakhat pehtlaihnak thazaang a der ngai caah a dang miphun dang hna bantukin kan thawng kho lo. Cu caah kan zapi kan ifun ahcun Kawlram mi dihlak kan aiawh lai. Western Australia i khua a sami Kawlrammi caah a tampi tuan awk a um. Rian, fimcawnnak, civics phunphun le a dangdang tampi tuan awk a um. State in Federal Cozah tiang a herh ningin Tlangcungmi issue kongah kan tuan lai. Cun ramchung ramleng caah international communities sin zongah a herhningin kan cawlcang lai timi ruahchannak he a si” tiah a biapeh ah achim.
Australia ahhin Kawlram refugee tampi a phanmi lakah Karen hi an tambik i Chinmi hi a pahnihnak hrawng an si lai tiah ruahdamh a si. Kawlram he aa pehtlaimi bu nganpi an ngeih bal rihlo caah le hmailei anmah Australia Kawlram kong siseh Ramchung lei kong he aa pehtlaimi a herhningin tuan kho dingin a tu bantuk bu an dirh hi a si tiah theih a si.
About The Author
