Australia Chin caah rammi sinak a ngah fawi cang lai: ACF
Kalay ah Senator Dean Smith biaruah lio. Photo: CHRO file
Salai Tluangkipthang — Australia ah ralzam sinak in a phanmi Chin miphun caah rammi sinak (citizenship) hmuh a fawi deuh cang lai tiah theih a si.
Australia ah Chin miphun fontomnak phu a simi Australia Chin Federation (ACF) nih ‘Australia Citizen Sawknak Kongah Thawngtha’ timi tlangtar in, Rammi sinak (citizen) a sok i a hngakmi hi minung a thong tampi an si. Hi chungah Laimi (Chin) zong tam ngaingai kan i tel ve. Cucu, WA in Senator Dean Smith bawmhnak in ACF le CHRO tawlrelnak in a tlamtling cang caah Chin miphun caah rammi sinak ngah a fawi cang lai. Rammi sinak (Citizen) a sokmi zatuak ah sawmnga renglo cu pek an hung si cang. Cucaah, Chinmi zong nih Rammi sinak cu fawizaang deuh in kan hmuh ve cang lai tiah ruahchannak nganpi kan ngei ko” tiah an thanh.
“Rammi sinak ngahnak ding kong ah, Australia ah Chin miphun an umnak State kip in community hoih cio zong in an cawlcangh ciomi le an izuam cio mi a si” tiah kan theih.
Chin miphun a kan dawtu le a kan bawmchantu Senator Dean Smith, ACF le CCCA upa cu 2020 January thla ah Chin Ramkulh a tlun hnu in Australia rammi sinak a sokmi Chin miphun hna nih IDs thathi in ngeih lo ruang ah harsatnak tomi kong he pehtlai in Australia cozah sin ah a chim.
“May thla 10 ni ZOOM in tonbiaruahnak ah Senator Dean Smith nih Australia ram sinak nan sok tik ah Kawlram lei IDs pawl nan hman ti lai lo. Australia ram nan phanh hnu i nan hmuh mi IDs pawl le a cozah lei he pehtlaihnak nan ngeihmi vialte kha tampi in hman khawh nan i zuam lai. Kawlram IDs nan hman ah cun Australia Cozah nih hlathlainak a tuah lai i caan saupi a rau lai. Hi kong hi Chinmi Khrihfabu vialte le Community vialte sin ah rak i thanh dih uh tiah Senator Dean Smith nih bia a kan cah rih” tiah ACF riantuantu Pu Renny Ceu Lian Mang nih a pumpak Facebook ah a tial.
Hi kong he pehtlai in July thla ah Perth khua ah Khrihfabu le Community upa hna he tonbia ruah nak an ngei than lai tiah theih a si.
Australia ah Khrifabu fontomnak Chin Christian Council in Australia (CCCA) ah AGS a tuan liomi Rev. Mang Hre nih a tanglei bantuk in a pumpak Facebook ah a tial.
“Atu chung hrawng i ka lungre a ka theih cem bikmi cu Australia citizenship soknak kongah a si. Kum 2 or 3 leng an hngah hnu ah hnon (refuse/reject) mi zong an tlawm lo. A ruang cu Australia an phak hlan ID [Hmatpungtin, Birth Certificate, Ingthawngsuh cazin tibnantuk] ngeih loin Australia rammi sinak pek a har cang. A liamcia kum 2 hrawng in kan u Didi Pa, Renny Ceu Lian Mang le Senator Dean Smith nih biatak tein an hung kan cawlcangh pi. Pastor Ca Lian Thang nih a herhmi khomh suat, CCCA le CHRO khuakhan ti laireltinak kan ngei. CHRO in Sang Hnin Lian Canberra cozah lutlai pawl an va ton hna. Cu lawng siloin Kawlram tiangah va tlung in tuanvo ngeitu vialte an va ton dih hna. Cu vialte i a phi chuak cu thawngtha taktak cu Didi Pa nih a kan thanh cang.”
“Rammi sinak sok tik catlap herhhai hleihluat deuh in (extra Documents) hal si ahcun Kawlram ah cah loin sianginn sayate le Chungkhar sibawi (Family Doctor/GP) sin tuah Kawlram in rami an si ko timi tuahter ding a si cang lai. Sianginn lei le kan Sibawi te nih kan sining tein an theih caah Sianginn lei le Sibawi te nih tuahpiakmi ca kha cohlan piak a si cang lai” tiah theih a si.
Australia ram kan hung pem tikah Rammi (citizen) sinak hi biapi bik pakhat a si ve. Ralhrang pawl ruangah siseh, Ralzaam le mipeem hna nih hnahnawhnak le buaibainak an hun chuahpimi ruangah Rammi sinak kha faakpi in hun rengh a si. Cucaah Minung a ting renglo nih rammi sinak kan hun hmu kho ti lo. Cuticun baangbat in kan hun um Cucaah a lamkip cawlcangh cio a si” tiah an Facebook Page ah an langhter. #
About The Author
