Australia Cozah Nih Chin Ralzam Le Community Upa An Ton Hna

TCP Online| 2019 October 31 — Australia cozah in Department of Home Affairs nih Malaysia le India lei in a rami chungkhar pali cu nizaan, 2019 October 30 ah an ton hna tiah kan theih.

Australia ram nan um nak, nan khuasak nak ding ah a cozah lei in siseh, a dangdang rian tuantu hna nih an in bawm hna maw? Nan phanhka ah zeidah nan caah a har bik mi a si, nan kan chim kho lai maw tiah an hal hna tiah theih a si.

Malaysia lei a ra mi nih kan phanh tik ah kan chungkhat lawng nih an kan dawn te lai tiah kan ruah. Nain, chungkhat lawng si lo in hawile kawm le Pastor te hna mitampi nih an kan dawn tik ah kan i lawm tuk hringhren. Rawl an kan pek, facang le chiti le a phunphun an kan pek tiah an chim, an leh hna tiah tonnak ah a telmi Pu Renny Ceu Lian Mang sin in kan theih.

Australia Prime Minister Scott Morrison le Australia Chin upa le CHRO Riantuantu hna

India lei in a ra mi nih kan phanh cangka in Khrihfabu le Community nih tha tuk in a kan zoh khenh an kan tlang tlak. Biakinn pumh kan duh zong ah an kan dawn, an kan thlah. Kan hna a ngam tuk hringhren tiah cozah palai cu an chimh hna tiah kan theih.

Cozah upa hna sin ah an chimmi chung in biapimi pakhat cu rammi sinak kong a si tiah kan theih. Hi kong he pehtlai in, “Australia ram um Chin ralzam nih bomh kan herh bik mi cu Australia ram sinak hmuh ding hi a bia pi bik a si. Rammi (Citizen) kan si lo ah cun University kai kan duh zong ah cozah lei in bomhnak phaisa zong cawi khawh a si lo caah University zong kan kai kho ti lo” tiah an chim.

Rammi sinak (Citizen) kan si lo tik ah zeitik poh ah kan ram ah kuat khawh kan si. Chin miphun cu cozah bomhnak lawng aa bochan mi kan si lo. Kanmah te in rian tuan le a cozah zong ngunkhuai (tax) pek kan duh caah rian kan tuan kho nak ding ah cozah lei in Training, Skill le Driving License kan hmuh khawh nak ding hi kan herh bik mi cu an si.

Hi tonnak kong ah, Pu Renny Ceu Lian Mang nih, “Australian cozah in Department of Home Affairs nawlngeitu hna cu Australia ramchung i, ramkulh (State) kip ah an tlawng dih hnu ah Western Australia khualipi Perth khua ah cun Chin Ralzam le Community upa hna he nihnih chung an i ton nak hi a si” tiah The Chinland Post ah a chim.

“Department Of Home Affairs cazin ning in 2018-2019 kum ah Ralzam in a rami hna hi Perth khua ah tam bik an phan i 97% hi khua dang ah thial lo in Perth khua ah khua an sak caah Perth khua hi ralzam pawl zalong tein um nak hmun tiah ti khawh a si” tin Pu Renny nih cun biapeh a chimchap.

Australian cozah in Department Of Home Affairs nih Chin Khrihfa le Community upa hna cung ah lunglawmh nak bia zong an chim tiah kan theih.

A bik in ralzam pawl riantuannak ding ah rian nan kawl piakmi hna le Biaknak lei nih bia tak tein nan tlangtlak, nan zoh khenhmi hna cung ah kan i lawm tuk. Cun, a tutan tonnak an ngeihmi kong hi Department Of Home Ministry sin ah report an pek dih lai tiah theih a si.

“A si khawh ah cun kan hnu kum 2018 December 3 le 4 i Prime Minister pa nan ton lio ah nan pek mi “A SUCCESSFUL CHIN REFUGEE RESETTLEMENT IN AUSTRALIA (Australia ah Chin miphun hlawntling tein umhmun khuarnak)” timi cauk (ripawt) nan pek mi kha nan kan pek khawh ve than ah cun kan i lawm tuk ko hnga” tiah cozah upa le ralzam upa tonnak ngeih lio ah an duhnak an langhter tiah kan theih.

A tutan cozah lei upa nih tonnak an ngeih hna hi zei ruang set ah dah a si timi cu chim a har ngai nain a tha lei kap a si ko lai tiah tonpumnak ah a telmi upa nih an chim.

Hi tonnak ah a cozah lei upa (Home Ministry) le ralzap hruaitu upa lawng silo in, Ralzam bawmhchannak riantuantu NGOs, le bu dangdang tampi an i tel tiah theih a si.

Na ruahning rak langhter ve.. (Leave a comment)

%d bloggers like this: