Australia Diary I; Ramdang Laimi  Ṭhitumpuai Chung In Cawn Awktlak Pa 12

Catialtu Pu Thla Hre| 2019 February 7| America ka rak tlawn lio ahhin Laimi ṭhitum puai kaa ton manh lo nain Australia khua lipi Melbourne, Adelaide le Perth khualipi pa 3 ah thla 2 chung ka tlawn lio ah ṭhitumnak (Wedding Ceremony) pathum kaa ton thiam. Ka tupa Val Ṭial Bawi Lian le Leeng Ngun Za Iang, Vaal Dawt Cung Lian le Leeng Sui Hlei Thluai, Vaal Amon le Leeng Sui Chin Ṭial hna ṭhitum lehthahnak le rawl danghnak puai ah kan nu (Aven nu) he kan i tel kho ve.

Lehthah nak kong cu Pastor rian deuh a si i kei nih chimding tampi ka ngei lem lo nain rawl dumṭinak Reception tuahnak ahcun chim lo in ka um khawh lomi cawn awktlak taktak pa 12 ka hmuh.

  1. Reception hmun ah puai a rak zawtu a hopaoh a caan ning te in an phan.

          Cucaah Reception Program vialte puai tuahtu nih lung si te le tlamtling te in an tuah khawh. Lai lei ahcun hmunkhat caan khat te ah phak kan i tim hna lo i a piikpaak in kan phan. A ra lio na, a kir lei cang na kan si.

  1. Wedding laksawng ( လက္ဖြဲ႔ ) ah thilri pek lo in an ti khawh tawk tangka tu an pek hna.

          Lailei cu thilri tu pek a tam deuh tik ah a ṭha ve mi cu a lo ko nain a donghnak ahcun thlalang Bizu chung lawng ah hmuh sawhsawh ding in chiah ding ah a tam deuh cu a cang tiah ka hmuh.

  1. Buffet System (Mah te cio duhmi lak i ei) in rawl ei cio a si.

          Upa deuh, Pastor deuh, Boss deuh, ti thleidannak a um lo. Monu le mopa hmanh anmah tein i lak i ei cio a si. Buffet system hi Lailei ah kan hman ve hrim a herh cang.

  1. Zei an tuah paoh ah a hmasa pa a hmasa, a hmanung pa a hmanung tinin “Artlang” in co cio a si.

          A hlei deuh in, Papek deuh in covo tin ngeih ti a um lo. Minung thleidannak a pel hmanh a um lo.

  1. Voikhat ca ( တခါသုံး) pakaan le keu an hman.

          Voikhat ca pakaan le keu an hman tikah a thurhnawm, a thiang lo ti a um ti lo i, hnawmbawm ah mah te cio in chiah a si. Lailei bantuk in Pakaan hlan le keu hlan i Motor in phorh, a kuai sual ah cham ṭhan ti bantuk a um lo. ( တခါသုံး) pakaan le keu hi a man zong a fak mi a si lo i a thianghlim, ti zong a tlo i hman cio khawh mi a  si ko.

  1. Rawl ṭiltlawt le hlawnh mi a um lo.

          Buffet system a si caah mah ei khawh tawk, mah duh mi meh i suah cio a si i vaivuanh mi rawl a um lo. Rawl/meh ṭhing um chung ah fonh i mi pek ṭhan zong a um kho lo. Rawl le meh zong a tlo ngai fawn.

  1. Chungṭuan an tha a dam ngai.

          Lailei minung 50 nih an ṭuanmi khi a tu an hmanning kan cawn ahcun minung 10 nih tlamtling tein an ṭuan khawh lai. Lailei ahcun chungṭuan le cabuai tlaitu (စားပြဲထိုး) hi an re a thei taktak. Anmah khi zeipaoh uanvo kan khinh hna. Anmah tuahpiak mi a tam tuk tawn.

  1. Ṭhutnak (VIP) timi a um lo.

          Lai lei ah cun ṭhutnak thleidannak hi a um tuk rih. Mah hi a herh bak lomi a si i ṭuanvo latu zong an re a thei tuk. A ṭhu tu zong i phu-hrun pah a hau cang.

  1. Ei din chiahmi aa khat dih.

          Lailei ah cun upa caah tiin meh thaw deuh, a chupuai tbk, phun dang deuh in chiahpiak i nu le ngakchia, zaapi caah zeihmanh a hlei in chiah lo, a si lo ah mithmai te lawng chiah piak. Hi zong he thleidannak pakhat a si.

  1. Security tlamtling tein an ṭuan.

          Motor parking, a chung lei thianhlimnak ca le Emergency caah uniform (Vest) an i hruk dih i ṭuanvo ṭha tein an lak. Kan mah lei zong ah hman a herh ve mi a si.

  1. A caan lio ah thilri nehnang an fim khawh dih colh.

          Kan nih lei ahcun puai dih hnu a thaizing hmanh ah ṭhaṭhi in kan fimtawl kho lo. A ruang cu a caan kan upat lo leng ah Buh ṭhing meh ṭhing a si lo ah eibang thletmi a tam tuk tawn. Um kheng pakaan, keu le ṭhutdan, cabuai khawlh ṭawl i Motor in pek ṭhan ding a tamtuk a um rih tawn.

  1. Pawngkam a thlianghlim tuk.

          A ruang cu a rami paohpaoh nih zei hmunthar hmanh an hlonh ta lo. Kuak an zu lo, Kunya an khai lo. Tissue hnihkhat te zong hnawmbawm te ah an chiah cio dih ko. Kan nih lei ahcun Puai tuah nak a thaizing zoh ah cun hmunthur aa pharh dih tawn caah fim tawl han a herh.

Biadonghnak

          Ramdang cu an ṭhangcho tuk kan phan kho lai lo ti lo in umtu ning, nun can ziaza le an khuaruah ning a hami paoh cu cawn cio awktlak bak a si tiah ka ruah.

Biakilh: Hi cabia cu catialtu pumpak hmuhning a si. Catialtu Pu Thla Hre hi Chin ramkulh Sipin zung ah Director rian caan saupi a rak tuanmi a si.

Leave a Commnet

%d bloggers like this: