Australia International Student Visa In Kal Duhmi Hna Nih Theih Awk

Catialtu: Salai Za Thawng

Salai Za Thawng| 2019 January 28| Lailei kan rak um lioah an rak chimh tawnmi kan theihmi cu ramtha cu riantuan a har lo, seh in riantuan a si caah riantuan a nuam ti hi a si. Cucaah ramthumnak kal in riantuan in phaisa tampi hmuh khawhnak a si tiin kan ruat cio i kan rak duh cio. Asinain kan phanh tikah lailei riantuan nakin a let tampi in a har deuh ai. Riantuan hmanh ah seh in riantuan ding kan ruah nain minung nih seh hmang loin seh nih minung tu a kan hman. Zingka 4:00 asilole 5:00am in thawk in riantuan kal hrim cu a fawi hrim lo mu.

Kum 2018 dih lei hrawng in Australia ah International Students Visa in kal khawh a si ti kha a lar ciammam i thla thum chungah minung 50 tluk Laimi cu kan phan manh. Cu hmanh cu Hakha le Thantlang chung cazin lawng a si pinah Melbourne chung lawngah a si. Lailei laithluak in kan tuaktaan dan ahcun sianginn kai kan ti sawh ko lai i rian kan tuan lai i Permanent Residence(PR) kan sawk pah lai i kan um lan lai ti kha tampi ruahnak a rak si. Sihmanhsehlaw, ramtha hrat cu lihbia le thlithup thil pakhat hmanh tuah khawh mi a si hrim lo.

Kan visa ah zarhkhat ah suimilam 20 chung riantuan caan cozah nih nawlpek kan si. Cu kan sianginn kainak kan tuahmi hmanh cu(NGO) nih Business an tuahnak a si tikah Institute sawhsawh khi a si. Kan sianginn kainak le Laimi umnak he aa hlat pah caah Tlanglawng in suimilam 1 tluk deng kal a si i $10 hi a dih tawn. Cucaah Myki card tuah a hau caah overseas (International students) cu duh zong duhlo zongah full fare in Myki cu tuah a si hoi. Siangngakchia caah cun Myki kha hnarcheu si rua tiah kan ruah nain University kaimi ca lawngah sianginn nih recommendation tialpiak in hnarcheu in tuahpiak khawh mi a si. Cucaah Institute sawhsawh ah kaimi International Students cu Myki a man fawi deuh tuahnak caah sianginn nih recommendation tialpiak khawh a silo. Zeicadah a si tiah ka hal hna tikah International Students cu mirum pawl kainak a si caah a man a tam hlei zong an ka chim. Kanmah Laimi mi sifak kan dirhmun ah tahchunh ahcun lei le van in aa thlau.

Catialtu: Salai Za Thawng

Zarhkhat ah phung ningin suimilam 20 lawng riantuan a si caah Company nih International Students hi an kan duhlo. Phungning tein suimilam 20 chung riantuan caan ngeih hmanh u sihlaw rian kha hmuh khawh a si ti lo. Cu lawng hlah sianginn kai hi zarhkhat ah a tlangmi nithum kai a si. Ninga chung kaimi zong an um len. Zarkhat ah nithum sianginn an kai i nihnih or nithum riantuan caan an ngei. A tlangpi nihnih hi tuan a si nain nihnih riantuan ding hmanh a fawi lo. Nihnih kan tuan khawh hmanh ah nihnih ah $200 tluk hi cash in hmuh a si. Thlakhat ah riantuan hi a tlangpi in ni 8 kan ngei. Thlakhat ah a tlangpi in hmuhmi hi $800 tluk a si. Thlakhat ah sianginn kai caan hi nithum kaimi caah thlakhat ah ni 12 kai a si i, nikhat ah $10 a dih cun ni 12 caah cun $120 a dih. Chuncaw ei kan duh rih ahcun a va dih rih hnga mu. Inn umnak man le ei man pek hau chap rih cu mu. . . .

Zarhkhat ah sml 20 chung riantuan man ah tax pek a hau. Tax peklo ahcun hmailei visa extend tuah tikah kan credit a tha ti lo ding a si fawn. Cun PR soknak caah credit a chiatter chap bei rih. Cun cawnmi course cungah PR hi aa ngat hoi. PR hmuhnak lam caah cun Nursing course si i cu hmanhah Bachelor hi caantha a um deuh. Age care(tar zohkhenhnak) le painting pawl hi caantha a um ve nain a tam lo. Cucaah Students Visa in PR sok in fawi tein hmuh khawh mi a si lo ti hi fian a hau. PR hmuh khawh  hmanh ah Melbourne hna ah cun a har i, khuate lei deuh ah a si hnga. . . . .

Atlangpi Australia ratnak caah $15,000 a dih pinah, General English le course pipa pekmi cannak he a buaktlak in $20,000 tluk a dih rih. A zapi in $35,000 a dih i full time riantuantu hmanhah kumkhat ah $35,000 hmuh hi a fawi lo ngaimi a si. International Students chinchin cu kumkhat chungah ni 144 riantuan caan a si i sml pakhat ah 100 rate in cun 14,000 tluk lawng kumkhat ah hmuh khawh a si. Cucu phungning in riantuan ah cun cu lawng hmuh khawh a si.

Lai leiin kan i ruah ning le kan phanh tikah thil sining hi aa dang ngai. Sianginn kai hmanh ah kai caan hi 85% tal a tlin lo ahcun Home Affair or Immigration Office ah report tuah in visa cancel piak a si fawn. Sianginn hman tein kai a hau fawn. Cucaah International Student Visa hi Australia kal hi lungder mi hna caah cun hruh sual zong a fawite. Income le expenditure tuak ahcun hmuh lei nakin chuah lei(hmannak) lei a tam deuh fawn. Ramtha min ngeimi a si caah phan ve tuah kan duh caah kan hei kal khi a si ko. Hi kalnak hi finthiamnak taktak kha le riantuannak si bak loin Business an si caah anmah phaisa hmuhnak a si caah a si ko. International Student pakhat nih poipang a ton sual ahcun le buaibainak a ton sual ahcun midang vialte a hnursuan ding zong a si.

Cucaah Australia rat aa timmi kan um rih sual ahcun na rat hlan ah i chir sual lo dingin fakpi khuaruat cikcek ta law a tha. Riantuannak kongah lungduh in a silo, sianginn kongah lungduh in a silo. PR soknak kongah ruahchannak a tlawm. Riantuan caan a tlawm caah phaisa hmuhmi a tlawm ve. Australia ratnak leiba le sianginn man pekding pawl tuaktan ah aa kaih lo ngai caah fakpi in khuaruah ciammam hnuah biachahnak naa tuahding hi kan duhpiak. Fawi tukin na ruah sual i na phak tikah a har tuk sual ahcun lungdongh a fawite. Cucaah na rat hlanin a har bak ko ti naa tuak naa ruah hnuin naa ngamh ko ahcun le na lungtthawn ko ahcun thiltha zong a va chuak phum kho ko hnga.

Tulio ah Australia ah International Student Visa in kal hi a har saling lio a si pinah rat aa timhmi tampi an um len kan theih siaherhnak he ka tial mi a si. Theih loin kal loin theih le hngalh cikcek hnuah i chir lo dingin thil tuah kha kan duhpiak ve hna caah a kal cangmi nih kan tawnmi chungin kan hrawmh hna. Rat aa timmi tampi an um rih kan theih. A phan cangmi hmanh Pathian kan bawm ko ti pinah I chir man a um ti lo.

Australia ram cu nan theih cio bantukin mawtaw ngeihlo cu ke ngeih lo he aa lo an ti tawn. Hawi ngeih cu ngeih kan duh ve, hawi nun kan hngar ve nain sining nih a pek lo tik le phaisa hmuhmi tlawm tikah cawk khawhnak lam um fawn lo. Pumh kal duh zongah, rian herh kal le thil cawk duh zongah, hawikom sin kal le nuamhnak hmun kal duh zongah hawikom sawmtu ngeilo ahcun innchung ah i erh peng a hau. Pumpak mawtaw a tam caah Bus hi an um ko nain a har ngai. Rawl dawr kan hmuh i kan mitthi i ei din cu kan duh nain kan kut cungah a ummi phaisa nih a zat lo hrat cu awr nih duh zongah ei khawh loin liamtak caan hi a tlawm ti lo. Kan duhmi le ei le cawknak ding caah kawlram phaisa thlen rate in kan tuak ah thil cawk hi kan i harh tuk tawn

Tulio ah a lar mi a si i rat aa timhmi tampi an.l um len ti thawng ka theih caah siaherhnak he ka tial mi a si. A phan cangmi zong kan i chir ti pin chimh awk um ti lo. Kan biak zingnu Pathian sin tu ah thlaza cam in ni le thla rel in lailei nunning te kan rak hlam ruangmang theu tawn. Runrep lo tangah sunghno chumrawl kha kan ngai ruangmang theu.

Catialtu:

Salai Za Thawng

Melbourne, Australia

Na ruahning rak langhter ve.. (Leave a comment)

%d bloggers like this: