Australia Prime Minister Nih Cozah Budget In WACCC Khrihfabu $400,000 Bawmhnak A Pek

0

TCP-Hakha| 2019 April 30| Western Australia Chin Christian Church (WACCC) Khrifabu ngakchia Sunday School kainak inn sak nak ding ah Australia Prime Minister Scott Morrison nih cozah budget chung in Aus $400,000 bawmhnak cu tuchun (April 30) ah a pek cang hna tiah kan theih.

“WACCC Khrihfabu ngakchia Sunday School kainak innsaknak caah Australia Prime Minister Scott Morrison nih cozah budget bak in Aus $400,000 cu tuni ah khrihfabu kutcung ah bawmhnak a kan pek taktak cang. Australia Prime Minister Scott Morrison nih a kan pekmi bawmhnak hi Election Campaign tuahnak caah bawmhnak pekmi a si lo. Australia cozah budget chung in a kan pekmi asi. Chinmi Tuanbia ah hi bantuk in Cozah Budget chung in Khrihfabu bawmh hi avoi khatnak bik asi men lai ti ka zumh. Bawipa min thangthat si ko seh” tiah Chin Charity Inc Chairman Pu Renny Ceu Lian Mang nih The Chinland Post ah a chim.

“2018 December 3-4 Australia Cozahpi a tongtu upa hna Chin Human Right Organisation (CHRO), Australia Chin Community Inc (East Melbourne), Chin Community Of Coffs Harbour Inc, Chin Community in South Australia Inc, Western Melbourne Chin Community Inc, The Chin Community in Queensland Inc le Chin Charity Inc Western Australia, hruaitu upa hna cungah lunglawmhnak tampi ka ngei”.

“Australia Cozahpi he ton tikah hmurka lawng si lo in “A SUCCESSFUL CHIN REFUGEE RESETTLEMENT IN AUSTRALIA” ti in Cahmai tlap 60 leng tlamtling tein a kan timhtuahpiaktu Pastor Ca Lian Thang le Pu Lian Ding Hmung cung zong ah lunglawmh nak tampi ka ngei” tiah Pu Renny Ceu Lian Mang nih a lunglawmhnak a langhter chih.

Tuchun Prime Minister he an i tonnak ah Chin Miphun cu zapi biaruahnak a dih hnu  khandang te ah (private room) Prime Minister he bawmhnak peknak a dang tein an ngei kho tiah kan theih.

2018 December Australia Cozahpi kan tonnak hna le Chin Miphun a kan dawtu le a kan bawmtu Senator Dean Smith riantuannak thawng in a kan bawmhnak hi aa pehtlai dihmi riantuannak asi tiah WACCC upat sin in kan theih.

About The Author

Na ruahning rak langhter ve.. (Leave a comment)

%d bloggers like this: