Australia Senator le Mizoram Governor hna Myanmar ralzaam kong bia an i ruah
The Chinland Post | 2022 October 7 – Australia ram Senator Dean Smith cu India, Mizoram, Aizawl khua ah a phan i Myanmar ralzaam kong he pehtlai in Mizoram Governor he October 6 ah an i tong tiah theih a si.
Mizoram Governor Hari Babu Khambhampati nih Australia Senator cu Raj Bhavan ah a ton i Myanmar ramkhel dirhmun ruangah Mizoram ah a rak i dor mi ralzaam mipi hna dirhmun kong an i ruah tiah Mizoram cozah nih a thanh.
Cu tonnak ah Australia Senator nih Mizoram ah ka rak ratnak a ruang cu Myanmar ralzaam hna kong he pehtlai in a si i ralzaam pawl an tawlrel dan kha Mizoram Governor cu a hal.
Mizoram Governor zong nih Myanmar ram dirhmun ruangah ralzaam tampi Mizoram ah an rak i dor i a tam deuh hi Chin miphun an si, Mizoram mipi hna zong nih a si khawh chung in an zohkhenh hna leng ah Mizoram cozah zong nih a biapi mi rian pawl a tuah piak hna tiah a chim.
Dean Smith zong nih Chin miphun le Mizo miphun cu unau nan si kha ka theih i Australia zong ah Chin muphun tampi an um i cozah nih a zohkhenh hna tiah a chim. India ram zong hi hawikom ṭha a si bantuk in Myanmar ralzaam hna ṭha tein zohkhenh ding in Australia Senator nih a hal.
Australia Senator cu Mizoram Chief Minister Pu Zoram Thanga he tonnak an ngeih leng ah Mizoram ram ah a ngan bik mipi phu a simi CYMA hruaitu pawl zong he tonnak an ngei tiah theih a si.