Avoi 1nak Thantlang Lai Caholh Le Nunphung Seminar Ah Biafunnak 11 An Ngei
Salai Elvis| 2019 February 5| Thantlang khua um Lai caholh le Nunphung Committee hna nih avoi khatnak Seminar an tuah mi chungah Lai caholh he pehtlai in biafunnak phun 6 le Nunphung he aa pehtlai mi biafunnak phun 5 an ngei kho tiah kan theih.
February 2 ah TBC (Diamond Jubilee Hall) ah tuah a si i mah ni ah Lai Caholh kong he pehtlai in Pastor Lian Chawn le Nunphung lei he pehtlai in Pu Ni Hre nih cathluan an chuahpi mi chung in ceihmaitinak le a tanglei bantuk in biafunak an ngei.
Caholh he pehtlai in: Laica hi CACC kalpi ningin zulh i zuam siseh, Laica hi sianginn ah tangli tiang cawn khawhnak ding lam kawl ding, Catial tikah Laica tein tial i zuam cio ding, Mizapi sin biachim tikah, Lai holh tein chim khawh i zuam cio ding (Miphun dang holh i cawntuk lo ding), Chin Miphun Ni (Chin National Day) ah Laica zuamnak tuah i zuam ding le mah ni zongah Lai holh tein caan hman ding.
Nunphung he pehtlai in: Lai laam thanchoter a hau i sianginn bak ah cawnding hmanh in timhtuah ah a tha, Laica chimtu Saya/ma te hna nih Lai laam chim kho dingin CACC nih lam kawl ah a thatnak kong, Lai hla in (Ahme ram Lai tlang) silo in ram hla (Chin National Anthem) zong tuah ah a tha. Chin Miphun Ni (Chin National Day) ah hin Lai nunphung langhter dingin i zuam ding, Nu le pa, Pi le Pu hna nih Lai tuanphung kha a thar in kan chim than hna seh law a tha, (tahchunhnak; Palo, Ngun nu le a nau tuanphung tibantuk… ) le Lai hla, Lai Nunphung sunhsak deuh ding kong biafunnak an ngei.
“Hi kan biafunmi hna cu CACC ah kan chuahpi colh lai tinak a si lo. Biafunnak kan ngeihmi kha Thantlang um Lai caholh le Nunphung Committee (EO) nih kan zoh ta lai i pehzulh ding ah kan lungtling ko ti a si ah cun Committee kan auh than lai i zapi lungtlinnak in hi vial hi CACC ah lanhter ding in kan lung tling ko timi pawl kha kan lanhter lai. Hi bantuk in Seminar zong kum khat voikhat pehzulh le tuah ding in timhtuahnak zong kan ngei” tiah Caholh le Nunphung Committee Secretary Pastor Dr. Duh Sang nih TCP ah a chim.
Hakha (Lai) Caholh le Nunphung Committee cu CACC hruainak in 2018 September 19 Thantlang ah an rak dirhmi bu a si. An hruaitu bik Chairman ah Pu Ngun Hram a si i Nunphung Committee Chairman Pu Ni Hre le Caholh Committee Chairman Pastor Lian Chawn an si.
About The Author
