Avoi 1nak UPC Khrihfabu PYD Icon Hlasak Zuamnak Ah Winner Laksawng Ks. 1,000,000 A Si Lai
Salai Cung Cung|2019 March 11| Hakha ah UPC (United Pentecostal Church) nih avoi 1nak PYD Icon hlasak zuamnak cu April 4 in 6 tiang Hakha District Headquarter Church ah an tuah lai. UPC Khrihfabu a si i kum 13 in 30 kar a simi paoh an i zuam kho lai tiah kan theih.
“Tu hi avoi 1nak kan tuah a si. Kan thawkka lawng a si caah kanmah UPC khrihfabu chung lawng a si lai.Hi hlasak zuamnak kan tuah hnawhchannak a ruang cu Pathian kan thangthatnak ah hin hla lei zong thancho chin u sih, cun kan mino pawl zong hlasak thiam tampi chuak kho hna seh ti le, pakhat le pakhat i theih hngalhnak tibantuk a um deuh khawh nakhnga, cun pengtlang kan khrihfabu a thancho chin nakhnga saduhthah he kan timhtuah mi a si” tiah Five Brothers Youth Ministry President Evan. John Fready nih The Chinland Post ah a chim.
“Hi hlasak zuamnak caah hin ramchung ramleng bawmhtu zong kan ngei hna. Kawlram huap minthang hlasa Sung Tin Par zong kan sawm nain aa manh lo tuk caah ka ra kho lai lo a kan ti. Hmailei zong kan pehzulh peng ko rih ko lai, a ruang cu zumhnak lei ah pengtlang khrihfabu a thancho chin lengmang nakding caah tuahmi a si. Cun hi zuamnak ah hin minung rikhiah a um lo zuam a duhmi paoh nih i zuam khawh a si” tiah a chim chap.
Hi hlasak zuamnak ah judge tuantu ding hna cu; P. Cung Lian Thawng, Mang Lian Chawn le Maikimmi an si lai tiah tuanvo ngeitu sin in kan theih.
Hi hlasak zuamnak ah aa zuam ding pawl cu Kalay District-3 UPC mino, Falam Area UPC mino, Hakha District mino, Zophei District mino, Mara Area mino chungin an i zuam lai tiah kan theih.
Hi hlasak zuamnak caah laksawng pawl cu; pakhatnak tangka Sing 10 (1,000,000) le trophy, pahnihnak tangka Sing 7 (700,000) le trophy, pathumnak tangka Sing 3 (300,000) le trophy an si tiah kan theih.
Hi hlasak zuamnak ah hin minung zeizat tam an i zuam zong ah Top 10 in thim colh a si lai. Top 10 in Top 7, Top 7 in Top 5, Top 5 in Top 3, Top 3 in Top 2, Top 2 in Top 1 thim a si lai.
About The Author
