Avoi 26nak CCU Graduation Day Ah Dr. Bawi Hu Le Pu Stephen Ni Kio Upatnak M.Lit Degree Pek An Si Lai

Salai Aung| 2019 March 15| March 17 (Sunday) zanlei suimilam 2:00 in HBC (Hakha Baptist Church) ah tuah dingmi avoi 26nak Chin Christian University (CCU) graduation day ah Dr. Bawi Hu le Pu Stephen Ni Kio upatnak degree -Master of Lecturer (M.Lit) pek an si lai tiah kan theih.

Hi kong he pehtlai in CCU-Academic Dean Saya Harvey Van Bik nih, “Tukum graduation day ahhin a hmasabik Master of Lecturer (M.Lit) degree minung pahnih kan pek hna lai. Cu hna cu; Dr. Bawi Hu le Pu Stephen Ni Kio an si, minthat upatnak laksawng kan pek hna lai.  Atu bantuk in pek kan timhnak hna cu CCU cachimtu nih Board of Trustees ah an chuahpi i BT nih a lungtling pi hna ca ah a si. Anmah pek ding  thim an sinak cu; Dr. Bawi Hu nih English to Chin Dictionary cauk a kan chuahpiak caah le Rev. Dr. Stephen Ni Kio cu Lai nunphung cauk tialmi in minthatnak a kan hmuhpiak caah CCU nih a hmasabik minthatnak le upatnak degree kan pek hna lai” tiah The Chinland Post ah a chim.

Dr. Bawi Hu

2018 March 29-April 1 tiang Hakha peng, Nabual khua ah tuahmi CACC (Chin Association for Christian Communication) Triennial meeting ah CACC nih kumkhat voikhat a pek tawnmi CACC award cu Pu Stephen Ni Kio an pek. Cu bantuk thiamthaim in 2015 kum ah Sayagyi Dr. Bawi Hu an rak pek tiah kan theih.

Tukum avoi 26nak CCU graduation day ah degree a la dingmi hi Mi.Div in minung 7, B.Th in 10, B.Min in 2, Dip.Th in 17, BAE in 3, BBA  in 12, Dip-Eng in 10 le Dip-BA in  42, an zapi minung 103 an si lai.

Elephant Logging in Bago Division

Award phun 11 peknak zong an ngei chih lai. Cu hna cu; AAC Award, CACC Award, David Van Bik Awards, HBA Award, Hornbill Award, Hrangzel-Kim Award, Seventeen Friends Forever Award, MDiv First Batch Award, Tial Fam Bor Award le 2016 BAE Award an si. Award hi minung 12 nih an ngah tiah kan theih.

CCU sianginn nih Degree a rak pek cangmi hna hi 2019 tiangah minung 1382 an si i atu kum 2018-19 kum ah cun 103 nih Degree an lak lai. 2018 kum tiangah khan cun 1279 nih an lak cang. Hmailei ah Master of Arts in Christian Studies zong kum 2 kai in tuahchap rih ding timhlamhnak an ngei. Mah tik ahcun Bachelor a dih cangmi paoh nih kai khawh a si lai tiah kan theih.

Leave a Commnet

%d bloggers like this: