Avoi 2nak Chin Women Organizations’ Network Bupi Ton Khawmnak le Thimnak Tlamtling in An Lim
2nd CWON Conference Group Picture with Chin State Govt. Spokeperson Minister U Soe Thet
2013 Chin National Conference biachahning in rak dirhmi Chin Women Organizations’ Network (CWON) cu a voi (2)nak Bupi ton khawmnak le thimnak ngei dingin November 28-30, 2018 tiang Carson Hall, Hakha ah an tuahmi tlamtling in an lim cang tiah thawngtheih a si.
Hi Tonkhawmnak biachimtu ah Chin ramkulh Cozah Chimrelnak nawl ngeitu Minister U Soe Thet siseh, CNF in Defense minister Col. Solomon siseh, Cawnpiaktu le biaruahnak tu ah Daw Sui Thluai Thang (Women & Law), Sayamah Kam No( Women & Child rights), Pi Sung Zi Mang (Overview of CWON) le Kachin CSOs chimtu ah Seng Nu Pai (All Kachin Youth Union) hna an si tiah theih a si.
Hi ton khawmnak ah a kaimi hna cu Nu phu cu Tonzang in Phu (3), Tedim in Phu (3), Falam in phu (1), Hakha in phu (3), Thantlang in phu (1), Matupi Phu (1), Mindat phu (1), Kanpetlet in phu (2), Paletwa phu (1), Tamu phu (1), Kalay in Phu (2), CNF nubu le Yangon in riantuan tu hna anzapi in minung (80) leng an kai tiah theih a si. Chin Nubu phu 27 fai a ummi lak ah Phu 20 an kai kho i caan karlak chungtel (13) an lut cang tiah theih a si.
Tutan CWON hruaitu thar thimnak ah Chairman hruainak si ti lo in General Secretary hruainak in kal a si cang. General Secretary ah Pi Sung Zi Mang, Asst. Secretary (Chaklei) I Pi Cer Cer, Asst. Secretary (Thlanglei) III ah Daw Aung Mah Phu le Ramkulh leng Asst. Secretary II ah Sayamah Mary an si. Secretary pali cungah Board of Trustee(BoT) a um i cu chungah Chungtel bu pakhat ah minung pakhat cio telh an si i minung cazin cheukhat an tlin rihlo caah caan tlawm pal ah fehter a site lai tiah kan theih.
Hi an tuahnak kong he pehtlai in CWON Chairman hlun Daw Sui Thluai Thang nih “ Hi ti bantuk ton khawmnak tuahmi nih hmuhning ruahning tampi kan icheu, theihthiamnak le hmailei hmun khat ah riantuanti duhnak tampi a kan pek lai. Nu kongah ihliphlaunak le kan covo zong tampi kan aupi khawh lai” tiah The Chinland Post ah a chim.
CWON cu 2013 November 15 Hakha ah Chin Nubu Phu (13) in rak dirhmi a si. 2017 kum ah Chinland Development & Research Society (CDRS) nih tonnak le training peklio bia an rak chah bantuk in tutan 2018 kum Euro-Burma Office (EBO) bawmhnak in le Chin Center for Peace & Reconciliation (CCPR) tawlrelnak in tonkhawmnak, Phunghram zohfelnak siseh, Bu tungtlang thlenremhnak siseh, Chungtel thar thim thannak siseh, Hruaitu le riantuantu thimnak hna an ngei hi a si tiah theih a si.
