Avoi (2)nak Thlacam Khawmpi Kalay Ah An Tuah Lai

0

TCP-Kalay| 2019 February 21|Pray for the World Ministry tawlrelnak in tuah tawnmi Thlacam Khawmpi (Prayer Conference), avoi (2)nak cu February 23-26 ah sunglawi ngai in CJC biakinn, Tazin (1) Kalay ah an tuah lai tiah kan theih.

Atu tan tuah dingmi Thlacam Khawmpi (Prayer Conference) hi Kalay ah branch pahnih a ummi Pray For The World Ministry Hakha Branch le Mizo Branch lakah Hakha Branch nih tuah an timhmi a si.

“Atu tan Khawmpi hi Thlacam Khawmpi a si bantukin, thlacamnak hi papek in kan karhlan pi lai. Cun chun ah cawnnak zong a um lai i cawnpiaktu ah Rev. Dr. Mansang (Gauhati, India) a si lai, cawnnak karlak ah singers pawl hlasaknak zong a um lai” tiah Pray for the World Ministry Hakha Branch chairman Rev. Bawi Ceu nih Dingthlu Lairel sinah a chim.

“Nitlak ram lei tampi cu Khrihfa hmasa an si ko nain anmah lila cu a rawkmi le thlacampiak a haumi an si caah an caah thlacam le, Kawlram telh in vawleicung dihlak ah Khrih a cohlang rih lomi hna nih Khrih an cohlan khawh nakhnga thlacam piak le, Khrih a cohlang cangmi zong puitling in kar an hlan khawh cio nakhnga thlacam piak le, vawleicung hmunkip harnak a tongmi zumtu vialte caah thlacam piaknak tuah ding le cu lei kong he aa pehtlai in thlacam tti le Pathian mithmai kawl tti ding ah Thlacam Khawmpi kan tuahnak bik cu a si” tiah Hakha Branch chairman Saya Bawi nihcun a chim.

Atu tan Prayer Conference 2019 (Hakha Branch) ahcun Pray For The World Ministry International Founder & President Pi Lalremsiami le a hawile zong an ra kho lai lai i amah nih speaker a tuan lai tiah kan theih.

Pray For The World Ministry Hakha Branch hruaitu hna cu, Chairman – Rev. Bawi Ceu, Vice Chairman – Pu Rokim, Secretary – Pu That Mang, Assistant Secretary Pi Zing Len, Treasurer – Man Tawi, Assistant Treasurer – Pi Ma Siang hna an si. Pray For The World Ministry cu Pi Lalremsiemi nih 2011 ah ni (40) rawlulhnak a ngeih ah Pathian sin in Vision a hmuhmi a si bantukin February 12, 2012 ah a dirhmi a si.

UK le India ah phungning tein riantuan khawhnak a ngeimi le hmunhma tha tein a ngeimi an si. Khrihfabu, ministry le mission hmunhma cu Kawlram telh in ramdang dang zongah an ngei tiah kan theih.

About The Author

Na ruahning rak langhter ve.. (Leave a comment)

%d bloggers like this: