Avoi 3nak CYO Cup Champion Cu Khuathar (A) Nih An Laak

Salai Cung Cung |2019 January 31| Avoi 3nak Chin Youth Organization (CYO, Hakha) Cup cu January 21 in 31 tiang an tuah i Khuathar (A) nih champion an laak tiah kan theih.

“Hi CYO Cup pumpululh chuih zuamnak tuah lai ah hin Sang upa pawl he meeting kan thu hna i meeting biachah ning in kan tuah tawnmi a si. Hmailei pehzulh ding ah cun Sang upa pawl he meeting ngeih dih hnu lawng ah aa fiang te lai. Hi CYO Cup kan tuahhnawhnak a ruang cu pengtlang mino vialte pakhat le khat i hawikomhnak le hmunkhat ah rian tuanti khawhnak ding ah a si. Hi CYO Cup tuahnak caah hin bawmhtu zong tampi an um” tiah Salai Van Lal Cross Thang nih The Chinland Post ah a chim.

Hi pumpululh chuih zuamnak ahhin pakhatnak laksawng ah Tangka Sing 7 le trophy le medal, pahnihnak ah tangka Sing 3 le medal pathumnak ah tangka Sing 1 le medal an si. Hi CYO cup ah hin Dinlo sang le Khuathar (A) final an kai i Khuathar nih 4-2 in pakhatnak an hmuh.

Hi pumpululh chuih zuamnak ah hin Goalbawh thiambik ah Khuathar in Van Khamh Thang, hnukham thiambik ah Dawrthar in Peng Za Bawi, alaikal thiambik ah Senthang in Ceu Hlei Thang, hmaikal thiambik ah Dinlo sang in Peng Lian, Goal tambik ngeitu hi Khuathar in Van Bawi Thawng, the best player ah Khuathar in Chan Thang an si.
Hi pumpululh chuih zuamnak ah hin phu 11 an chuak kho i pumpululh chuih zuamnak luhman hi tangka 50,000 a si.

Hi pumpuluh chuihzuamnak ah Group A , B, C ti in an then. Group (A) Dawrthar (A), Dawrthar Keisih, Khuathar (B), Hakhathar. Group (B) Pyidawta, Dawrhlun, Senthang, Group (C) Dinlo, Khuathar (A), Cawbuk, Ketheibo an si.

Avoi 1nak CYO Cup pumpululh chuih zuamnak ah Mi-E nih pakhatnak an hmu. Avoi 2nak ah Hakha Khuathar nih an champion an laak. Avoi 3nak ahHakha Khuathar (A) nih an hmu tiah kan theih.

Na ruahning rak langhter ve.. (Leave a comment)

%d bloggers like this: