Avoi 3nak Hakha College Major League Pumpululh Chuih Zuamnak An Tuah
Hakha Collage, Major League
Salai Cung Cung |2019 February 1 | Hakha College nih avoi 3nak Major League pumpululh chuih zuamnak cu January 26 in February 2 tiang an tuah lai tiah kan theih.
“Hi bantuk pumpululh chuih zuamnak kan tuahnak a ruang cu siangngakchia hi ngandamnak lei ah siseh thluak lei ah siseh lentecelhnak lei i an thancho chin nakhnga, kan college chungin lengtecelh thiam tampi an chuah in hmailei ah ramthen le ramkulh zuamnak tiang phan kho hna seh ti ruahchannak he kan tuahmi a si” tiah Hakha College Saya Dr. Salai Ram Ngai nih The Chinland Post ah a chim.
Lentecelhnak hi nu pumpululh chuih le pa pumpululh chuih zuamnak tiin an tuah. Nu he pa he pakhatnak laksawng ah tangka Singkhat (100,000) le Medal, Phnihnak laksawng ah tangka 70,000 le Medal. Cun thiamhlei Goalbawh, hnukham, alaikal, hmaikal, a thiambik tiin laksawng medal le tangka 10,000 cio pek an si lai. Hi pumpulh chuih zuamnak ah hin Group (A) le (B) in an then i nu he pa an zapi team 8 an si tiah kan theih.
Hi pumpululh chuih zuamnak caah laksawng pawl hi Chin ramkulh social affair minister Pu Pau Lun Min Thang le Hakha khuanu khuapa in Pu Chum Ling nih an bawmh hna tiah tuanvo ngeitu sin in kan theih.
Hakha college ah tu lio principle cu Dr. Lian Za Khup a si i Siangngakchia Day in a kai mi 763 le a lengkai mi 628, an zapi 1391 leng an si. Ca chimtu saya-sayamah zapi 47 le staff 84, an zapi 131 an si tiah kan theih.
Hakha college ah cawn khawhmi major hna cu; Myanmar, English, History, Geography, Oriental Study, Philosophy, Chemistry, Physics, Mathematic, Zoology le Botany an si. Law zong hi hmailei ah cawn khawh ding in timhtuah a si tiah kan theih.
