Avoi 3nak Panglong Hnatlaknak Ramkomh Hluttaw Nih An Fehter
City Hunter| 2018 August 8| Avoi 3nak kumzabu 21 Panglong conference in hnatlaknak an ngeihmi cu ramkomh hnatlaknak ti in ramkomh hluttaw nih dohkalhtu um lo in an fehter cang.
A luancia July 11 in 16 tiang an tuahmi kumzabu 21 avoi 3nak Panglong conference ah suttung pali in biatlang 14 hnatlaknak an ngei. Cu hnatlaknak ngeihmi ramkomh biaceih bawizik U Htun Htun Oo nih hluttaw ah a chuahpi.
“Ramkomh remdaih ceihmaitu bawmchantu committee lamthluan ning in UPDJC cu ramkomh hnatlaknak cheuchum in siseh, ramkomh hnatlaknak biahren in siseh, a naihniam bik tuahmi ramkomh hluttaw ah chuahpi in fehter ding timi in siseh, ramkomh remdaihnak conference kumzabu 21 panglong avoi 3nak conference hnatlak minthutmi dal 2nak tiah ramkomh hluttaw ah an chuahpi le an fehter hi a si.”
Avoi 3nak kumzabu 21 panglong conference ah cozah, hluttaw, ralkap, tlangcung hriamtlai phu, ramkhel phu hna nih ramkhel, sipuazi, zatlang, loram le pawngkam kong tibantuk suttung pali ceihmainak an ngei.
Ramkhel kong suttung ah biatlang pali, sipuazi kong suttung ah biatlang pakhat, zatlang kong suttung ah biatlang 7, loram le pawngkam kong suttung ah pahnih, a zapi biatlang 14 hnatlaknak an ngei kho nain runvennak kongkau suttung cu an ceihmai kho lo.
2017 ah thawkmi avoi 2nak panglong conference ah hnatlaknak 37 an ngeih caah atu ahcun hnatlaknak ngeihmi zapi 51 a si cang.
2015 kum October thla ah cozah le tlangcung hriamtlai phu 8 nih NCA min an thut hnu ah December thla ah tuahmi ramkomh hluttaw an fehter.
Cozah hlun chan 2016 January thla le cozah thar chan August thla ah tuahmi remdaihnak conference ah hnatlaknak biahren minthutmi an ngei kho lo.
Rampi Ruahnak Petu Daw Aung San Suu Kyi zong nih 2020 kum dih hlan ah democracy federal policy pawl ceihmai khawh dih ding in remdaihnak conference cu a tlawm bik voi 3 tal tuah khawhnak ding in forhfialnak a ngeih hna.
Ref: RFA
About The Author
