Avoi 7nak Lai Biazai Le Zuun Hlasaknak Salai Van Dawt Bik@Riaklang Nih A Tuah Lai

Salai Elvis| 2019 May 7| Salai Van Dawt Bik @Riaklang nih amah pumpak in avoi 7nak Lai Biazai le Zuun hlasaknak cu 2019 May 11 (zarhte ni) Thantlang Hauka Bung Resort ah a tuah lai tiah kan theih.

“Hmailei ah Lai bia, Lai holh le Lai hla a tlau lo i a feh chin nakhnga, cun Lai zuun hla le Lai Biazai a thancho khawhnak ding saduhthahnak he tuahmi a si. Caholh dawt cu Miphun dawt a si timi hi kei mah ka tlaihtleng zong a si” tiah tawlreltu Salai Van Dawt Bik@Riaklang nih TCP ah a chim.

Atu bantuk in kum dang zongah Salai @Riaklang, Lalawmpui, M. Cung, Salai Kep Chin Thang, Mai Rem Hlei Par tibantuk nih rak thok in rak tawlrelmi asinain tukum cu aa manhmi an um lo caah a tubantuk in Salai Van Dawt Bik@Riaklang pakhat lawng nih tawlrel in tuah a timh hi a si.

“Mah ni ah Lai zuun hla saknak zong Hlasak thiam M. Kung, Mai Biak Tha Cuai, Iang Hlei Par, Iang Hlei Rem, Ngun Hnem, Van Neih Thawng le Van Joel an si ve lai. Bia a tial thiam mi hna nih anmah le an tialmi te kha an rel ko lai i a tial thim lo mi hna nih relding in ka chiahpiak cia hna lai, a tu lio ah Biazai Cauk relding 11 cu ka damh khawh cang” tiah @Riaklang nih a chim.

Mah ni ah Sponser lei in Hakha Town Coffee le Salai Ceu Bik Thawng an si lai. Special in sawm mi hna, Salai Van Biak Thang, Lalawmpuia le Tlaitlan an si i mah ni ah an mah lila nih Biazai hrilhfianhnak an ngei hna lai. Chuncaw ah Ra buti le Be Buti dangh an si lai i zinglei suimilam 10 in an thok lai tiah kan theih.

Na ruahning rak langhter ve.. (Leave a comment)

%d bloggers like this: