Avoikhatnak Hakha Um Mino le US mino Iton Biaruahnak Le Hmuhtonmi I Cheuhbauhnak An Ngei
Salai Bawi| 2018 June 10| USA in Chin mino Lairam ah internship in a rak tlungmi le Hakha um Chin mino hna cu Chin Center for Peace and Reconciliation(CCPR) le Chin Human Rights Organization (CHRO) tawlrelnak in June 9 ah tlamtling tein ton biaruahnak le atu lio Lai mino nih kan ton cuahmahmi thil kong ceihhmaitinak le hmuhtonmi i cheuhbauhnak an ngei.
Hi ton biaruahnak ah a tlangpi paruk (6) in chimrelnak an ngei i US lei nih an tonmi le Lairam lei in kan sining pawl chimrelnak an ngei. Cu hna cu, Ram chung ramleng zeitindah pehtlaihnak kan thawnter lai, Mino le Fimnak, Mino le rian, Mino le Ramkhel (Youth and Politics) le i thialkamnak ah tonmi harnak pawl an chim cio hna.
Salai Van Lal Lian nih mino le fim cawnnak timi tlangtar in a chimmi ah, “Tanghra sungh awn kan niam tukmi hi ngaihchia tuk a si. Cucaah, a kakip, a lamkip in mino nih kan tuan khawh tawk, kan ti khawhnak cio kan izuam hrimrhim a herh,” tiah mino hna sin ah biacahnak a ngeih hna.
Rian le Mino kong he pehtlaih in Joseph Biak Cin Thang nih, “Ka theih le ka hmuh khawh tawk ah hin, zikhnawh eihmur cu a tam taktak tiah ka theih. Cu ve bantuk in Lairam um mino tamdeuh cu riantuan nan i nautat, nan tha a thu deuh rua ti hi a si. Cucaah, zei bantuk mino, a rummi nan va si zong ah nanmah thiamnak kha i rinh chan in tuan izuam ko ulaw ti hi forhfial kan duh ko hna,” tiah biacahnak a chim.
“Hi bantuk hi tuah kan duhnak a sau taktak cang. Hi hnu zong ah CCPR in mino thanchonnak le ihruaithiamnak lei zong tuah lengmang hi kan duh mi a si. A ruang cu, Chin mino tampi cu mi hmai chuah in mah duh te hmanh a chim ngam lo kan tam tuk,” tiah CCPR riantuan lio Salai Van Bawi Mang nih The Chinland Post ah a chim.
Hi biaruahnak ah bia a chimtu hna cu; CCU siangngakchia lei in Marry Zai Hnem Sung BBA final, CYO ai-awh in Salai Bawi Uk Thang le USA CYO_NA in internship a rak tuanmi hna Meriam Sui Tin Tial, Salai Van Neih Bik, Salai Joseph Biak Cin Thang le Salai Van Lal Lian an si.
About The Author
