Aw-zai Kongah Chimtu Le Cawnnak Zeihmanh Ka Ngei Lo: Van Hlei Iang
Salai CungCung|2019 April 9| UPC Khirhfabu FBYM (five Brother Youth Ministry) tawlrelnak in tuahmi avoi 1nak PDY Icon hlasak zuamnak ah Pakhatnak hmumi Mai Van Hlei Iang nih hlasak kaa zuam lai ah Pathain sin thlacaam nak biatak tein ka ngeih peng ruang ah atu bantuk in pakhatnak ka hmuh hi a si. Hlasaknak lei kongkau ah training kaimi ka ngei lo, chimtu zong an um lo, kei mah tein Video chung hla pawl ka zoh i ka sa tawn tiah Mai Van Hlei Iang nih The Chinland Post a chim.
“Atu bantuk in PYD Icon hlasak zuamnak ah pakhatnak ka hmuh cu a hmasabik ah Pathian thawng in a si. Cun ramchung ramleng thazaang petu nu le pa u le nau cung ah kaa lawm. Pakhatnak ka hmuh lio ah hin kaa nuamh tuknak ah ka mitthli tiang a luang. Hmailei zong ah Pathian ramkuahnak caah kaa zuam chinchin lai. Hi hlasak zuamnak caah zaankhua dei in Pathian sin thla ka cam, cun hla zong chun nitlak in timh tuahnak ka ngei. Pakhatnak hmuh ka duh caah hla hi chun he zaan he ka ngai i ka sa. Hi hlasak zuamnak caah hin ka chungkhar le ka khirhfabu lei zong nih tampi thazaang an kan pek. Hlasaknak lei kongkau ah training kaimi ka ngei lo, chimtu zong an um lo, kei mah tein video chung hla pawl ka zoh i ka sak tawn” tiah Mai Van Hlei Iang nih The Chinland Post ah a chim.
Van Hlei Iang nih hla zah le hla thiam aa fawih nak le Gospel singer dirhmun in hmai lei ah hlasaknak in ka caan ka hman peng ko lai tiah a chimnak kong aa manh le aa dam ko ah cun zeibantuk hlasaknak sawmmi paoh kal peng khawh ka zuam lai tiah a chimchih.
“A ho paoh nih Pathian hla le Crusade lei siseh Concert ah siseh sawm khawh ka si. Kei hi Pathian hla lei deuh ah ka rak kal cang mi ka si caah lovesong lei cu ka sa lai lo, Pathian hla le ram hla deuh ka sa lai. Lovesong sak hi cu a sual ka ti lo kei mah ka nunnak ah Pathain hla lawng sa ning tiah timh tuahnak ka ngeih caah love song ka sak lo bia a si. Hmailei ah cun Album pakhat tal cu i chuah kho ve ning tiah saduhthahnak ka ngei. Tukum chung ah ram chung ramleng hlasak kal hi ka duh ko nain ka kum 16 lawng ka si rih pin ah ram leng lei hlasak kal cu kum 18 cung lawng a ngah caah tukum chung cu ramchung deuh ah hla ka sa lai. Hmailei ka karhlannak ah Pathian a sunparnak ka langhter khawh chinchin nak hnga thlacaam kan bawm peng u” tiah a chim.
“Kafa hi a ngakchia ka tein hla lei a zuam tuk mi a si, fimnak lei ah biataktein thazaang kan pek ko nain a ngamdamnak lei a that deuh lo caah taang 8 in aa din i a mah duh mi hlasaknak lei tu kal ko seh Pathian sunparnak caah tiin thazaang kan pek. Hla hi video chung in tampi ka ngeihter i ka cawnter, an aw an chuah ning siseh a dangdang hlasak ning pawl tha tein ka zoh ter i ka cawnter. Hlasaknak lei hi biatak tein kan mah zong nih thazaang kan pek. Pakhatnak a hmuh mi cung ah pakhatnak ah Pathian min ka thangthat. An i zuam lio ah hin ka thinphang tuk ve, pakhatnak hmuh le hmuh lo cu Pathian sinah a um i ruah lopi in pakhatnak a vun hmuh ve tik ah kaa lawm tuk. Pathian thawng in a si, a mah Pathain a ram kohtertu fanu tha ah si chinchin ko seh” tiah Mai Van Hlei Iang a pa nih The Chinland Post ah a chim.
Van Hlei Iang cu a pa pastor Pu Van Leng Mang le nu Pi Cuai Sung an fanu a si i Tikir khuami a si i Thantlang ah khuasa lio mi an si.+++
About The Author
