Azovstal sehzung a khammi Ukraine ralkap nih a sungh an pek dih cang tiah Russia nih a thanh
The Chinland Post | 2022 May 21 – Mariupol khua ah a ummi Azovstal sehzung ah a donghnak tiang Russia ralkap a dohmi Ukraine ralkap pawl an zapi te nih a sungh an pek dih cang tiah Russia nih May 20 ah a thanh.
Ukraine ralkap 531 nih a hnubik khuah in a sungh an pek tiah a chim.
May 20 ah hriam chiah in a sungh pemi Ukraine ralkap pawl cu mawṭaw in an phorh hna i Russia lei a ṭangmi Donetsk hmunhma ah May 21 ah kuat an si.
Azovstal bom khor chung in an rak chuak i sungh a pemi Ukraine ralkap hi a zaa leng an si nain a fiang in theih a si rih lo.
Hriam chiah in sungh a pemi Ukraine ralkap 2,000 tiang an phan tiah Russia nih a chim ko nain Ukraine cozah nih zeihmanh a chim rih lo.
Ukraine ram nih ngeihmi TV program ah Ukraine President Zelenskyy nih Azovstal chungah a ummi Ukraine ralkap pawl hriam chiah ding in May 16 ah nawl pek an si cang tiah a chim.
Ukraine vanlei ralkap nih Mariupol khua ah a tapmi ralkap pawl bawmh ding in an i zuam ko nain tlamtlinnak um lo in a thimi an tam tiah Ukraine President nih a chim.
About The Author
