Bangladesh Ram Dhaka Khua Inn Kanghnak In Minung 69 An Thi
TCP-Thantlang| 2019 February 21| Bangladesh ram chung Dhaka khuapi Chemical thilri pawl chiahnak in mei a kangh caah a tlawmbik minung 69 an thi cang tiah theih a si.
February 20 zan ah inn dotli a sangmi a tangbik khan in Gas dur pakhat mei an hman lio ah an i thlahphoih sual i cu hmun cu Chemical thilri chiahnak hmunhma zong a si caah a tubantuk in inn a kangh hi a si. Hi inn dotli lawng si lo in a pawngkam inn zong a tlaih chih dih tiah Bangladesh ram meithahnak zung lutlai Aly Hamat nih a chim.
“Atu lio ah miruak 56 lawng kan hmuh rih hna, kan kawl lio hna an si i hi nak in a thimi an tam deuh kho rih. Hliamhma a tuarmi minung 50 hrawng zong sii-inn ah kan thlop lio hna a si” tiah tuanvo ngeitu pakhat nih a chim.
Hi inn kangmi cu sumilam 5 tluk a rauh hnu ah mei an thah khawh i zinglei tiang ah meitil le a linsa mi pawl zong an um rih. Bangladesh thawngthanhca hna nih ti a har caah hmundang inn saknak an i chiahmi ti tiang in a va phurhpiak hna tiah an chim.
Nawlngeihnak ah a zaangder ngaimi Bangladesh ram cu kumchiar te minung za leng an thi peng. 2013 kum lio zongah sehzung pakhat a rak kaang bal i minung 1100 leng an rak thi cang tiah kan theih.
Ref:Reuters, The Fifth Wave News
About The Author
